Hpakant lam de Myen hpyen n gun htu shadut wa ai majaw, Kamaing hte Hpakant lapran lam shara 2 hta KIA dap hku nna, lai sa lai wa ahkang n jaw hkum pat da ai lam chye lu ai.
Mogaung kaw nna lung wa ai Myen hpyen dap ni Hpakant lam mayan de htu shadut wa ai majaw, August 22 ya shani dai Myen hpyen hpung ni hpe KIA Dung 44 ni Nlung dup makau hta hkap shingla gasat dat ai hpang, August 23 ya shani kaw na Hpakant lam hpe gan pat da ai re lam, dai ginra na mung shawa ni KNG shiga dap hpe tsun dan ai re.
“Myen hpyen dap ni htu shdut wa ai majaw, gan pat kau ai ga rai nga ai. dai hkum pat ai shara gaw, Ma U Pin lahta Kyauk Htu (Nlung Dup) hte, Gawlu Yang kaw pat da ai nga tsun ai. Ya ten Namya mare kaw mawdaw 100 jan chyat taw ai ga rai nga ai.” nga Namya mare masha langai tsun ai re.
Ya na zawn Hpakant lam pat ai gaw, KIO ginjaw matsun hte pat ai n re sha, hpyen masa kahtet ai majaw, dai ginra na dap dung ni kaw na jahkring gan pat da ai re lam Dukaba Nhpang Naw Bu KNG de n dai zawn matut tsun dan ai re.
“dai hte seng na gaw, anhte ginjaw kaw na matsun na pat ai n re. dai kaw lit nga ai ni gasat poi nga nga ai majaw, mung shawa ni pru hkawm pru sa rai jang, Myen hpyen ni rim na hpyen ninggang shatai woi na hpe tsang ai majaw, gasat poi laman gan pat ai rai na re nga.” nga tsun dan ai re.
Namya mare hta du nga ai Myen hpyen dap ni Hpakant de matut lung wa nmai hkra, Nlung dup hte Gawlu Yang mare shara lahkawng hta hkum pat da ai re lam chye lu ai.
Dai sha n ga, August 22 ya shani Myen hpyen dap hte KIA dap larpan majan byin wa ai majaw, Namya Myen hpyen dap kawng kaw na gap shadam dat ai laknak kaba si langai mung shawa n ta wa hkrat hkra ai majaw, asak 35 ning ram re a myu shayi langai hkala hkrum wa ai hte, dum n ta yawng mung hten mat ai lam chye lu ai.
Ya ten Hpakant de mawdaw pru shang ai lam tsep kawp n nga mat ai majaw, gunrai manu ni tsaw rawt taw nga ai re lam chye lu ai.