Hpakant Mana mare dingdung, Tarwar shadaw n pu, Lucky One company htu sha lai wa ai lung seng n hkun, ga shingbut gyi ru wa ai majaw, Lungseng htu taw ai masha marai 30 jan mat taw nna, marai 10 daram gaw tsi rung hta du taw sai lam, hpakant ginra masha ni tsun ai re.
Lai wa sai August 13 ya shana maga hkying 3 chyen daram aten hta, company ni kabai da ai ga shingbut gyi ru wa ai majaw, hka nawng n tsa hkan lung seng htu nga ai ni hpe hka hte wa kanawn gun la kau nna, masha ni sum wa ai ni law ai nga dai ginra na mung shawa ni KNG shiga dap de tsun dan ai re.
“Madung gaw ga shingbut gyi ru hkrat wa ai, hka hpe wa kanawng ashun dat ai rai nga ai. dai kanawng wa ai hka n gun hte ကပ်ပါး n tsa hkan lung seng htu nga ai masha ni, makau hkan na jak ni yawng hpe wa gun la mat wa ai masa rai nga ai. ya si ai gaw gade kun a tsawm tup hkrak n chye shi ai. lauban marai 6 na hkawng ma marai 40 jan ram re nga tsun ai.” nga nna dai ginra na lit nga ai salang langai KNG shiga dap de tsun dan ai re.
Ya ten dai hka hte wa gun ai kaw lawm mat ai marai 10 daram hpe Hpakant mung shawa tsi rung hta htaw sa da lu sai rai nna, mat taw ai mash ani hpe mung, matut tam taw nga ding yang re lam chye lu ai.
Ya gyi ru ai n hkun gaw lanam ta aten gan jahkring da ai hta ya na zawn gyi ru wa ai re lam chye lu ai. Ndai laman Hpakant ginra de marang kaba ding yang htu taw nga ai re.