Katsu hpyen yen mung shawa ni a matu htaw sa wa ai n gu buk 30 hpe, Shwe Nyaung Pin Myen hpyen dap Hk-M-Y (321) dap ni hkap rim la kau ya ai lam chye lu ai.
August praw 11 ya shani Waimaw kaw nna htaw sa wa ai n gu buk 30 hpe, Myen hpyen dap hkap rim nna, Waimaw Hk- L -Y (58) dap de htaw mat wa ai hpang, Tungbing hte rau gau ai masha hpe gaw Waimaw balik dap hta rim sharen da ai lam chye lu ai.
“Ndai laman n dai de gasat poi ding yang byin taw ai re nga yang she, shanglawt ni hpe sa htaw jaw ai ngu n tsen n hten ai hte hkap rim la kau ya ai ga rai nga ai. shan hte hku na tara shang n gu n mai htaw shalai ai nga na laika shapraw da ai chyawm n nga ai le. Majan ten n gu htaw ai ngu hku na sha rim ai ga rai nga ai.” Nga nna ginra masha langai tsun dan ai re.
Ndai lam hte seng nna lit nga ai mare buga salang ni sa jahkrup bawng ban ai raitim, Tungbing gau ai mungshawa hpe dat ya ai lam rai n nga shi ai hte, tara jewat na masa nga ai lam matut tsun dan wa ai re.
Ya htaw sa wa ai n gu gaw, Katsu hpyen yen ni a matu garum jaw ai n gu rai nna, ya ten dai ginra hpyen masa lam a majaw, hkawm sa hkawm wa lam ni mung yak hkak taw nga ai re.
Myitkyina-Manmaw lam kaba n tsa Katsu mare na hpyen yen mung shawa ni gaw, lai wa sai 2011 ning majan a majaw hprawng yen nna, 2022 ning KBC hte Nippon Foundation ni n ta gap ya ai hte mare ningnan bai wa gaw de ai laning mi rai n hpring shi ai ten, ya na zawn majan masa kalang bai shuk shanut wa ai majaw, ginra masha ni myit tsang nga ai re.