Namsan Yang mare makau grup yin hta Myen hpyen dap n bungli shana shagu sa du pyen gayin taw nga ai hte hpyen masa matut shaja hkat taw nga ai lam chye lu ai.
Myen hpyen dap gaw Madi Yang hte Awngja mare makau grup yin hta chyat rawng taw nga ai rai nna, hpyen n gun garum pru shang mung n mai, lahkawng maga hpyen masa shaja hkat taw nga ai lam, dai shawng lam hta nga ai KIA magam gun langai KNG shiga dap de tsun dan ai re.
“Myen hpyen dap ni Madi Yang hte Awng Ja mare hkan chyat rawng taw nga ai. Anhte yawng hte yawng wang da ai. pru wa mung n mai, hpyen garum mung sa n mai, shan hte pru wa ai hte gaw nut hkat sana rai nga ai. n bungli chyawm shana shagu sa du pyen gayin ai, yup pyi n mai ai.” nga tsun dan ai re.
July 26 ya shana, Myen hpyen dap ni pru wa ai shiga majaw, aten gadun majan byin ai lam chye lu ai.
Ya ten dai ginra mayan hta, laknak kaba, drone ni hte shani shagu ngu na gap hkat taw ai rai nna, Myen hpyen n bungli mung shana shagu ngu na sa du pyen gayin taw nga ai lam chye lu ai.
July 26 ya shani hta mung Mali Yang kaw na Ja Pu maga de sa wa ai Myen hpyen dap ni hpe KIA Daap Nawng Dapdung ni kaw na, Bawm hte hkap shing la gasat dat ai hta Myen hpyen dap maga sum machyi lam ni nga wa ai hpe chye lu ai.
Dai zawn Waimaw – Kanpaiti lam kaba n tsa, Kanpaiti maga de na yu wa ai Myen hpyen mawdaw hpung ni hpe KIA Dung 3 ni, Gawq Nan hte Lajawng mare lapran hta hkap shing la gasat dat ai lam nga ai re hpe shawng lam hpyen shi sawk ni kaw na chye lu ai re.
Ya ten Myen hpyen dap ni gaw, Jinghpaw Mungdaw maga de hpyen n gun kaba hte ding yang htu shadut jat bang taw nga ai rai nna, kawng lam, hka lam yawng hku na sinat laknak machyu pala ni hpe htaw shalai bang nga ai re.