KIO Sinpraw Dingdung Ginwang Ginjaw, Masat (7) Dap Ba uphkang ginra Miwa mung jarit hta June 23 ya jahpawt marang kaba htu nna ga sharut gyi ai majaw, Hpare hpyen yen mungshawa ni lu hka yak hkak nga ai lam chye lu ai.
“Yahte ga gyi ai gaw chyen mi sha re. Ya ngam taw ai gaw grau law ai. Sadi na nga taw ai re. Galoi gyi wa na kun myit tsang taw nga ai. Ma ni jawng sa jawng wa ten gyi wa na hpe tsang taw ai. Marang htu na hka ni mung yawng mum mat ai. Lu hka mung gara kaw na sa la lu na kun nchye mat ai. Ya hpyen yen ni lu hka grai yakhkak nga ai re” nga nna mung shawa langai tsun ai re.
Ya na zawn ga gyi wa ai lam gaw, Hpare hpyen yen dabang lahta hka len la ai bum ntsa kaw KIO asuya kawn n’ta langai gap la na matu lai wa sai December shata kaw gaw gap hpang nga nna, ga htu sumpum da ai majaw, marang htu ai hte kalang ta ga gyi wa na hka kaba wa re lam lahta na ginra masha kawn matut tsun dan ai re.
Hpare hpyen yen dabang gaw Miwa mung jarit masat shadaw 6 kaw nga ai rai nna, laiwa sai 6 ning kaw BGF, Pyitutsit, Myen hpyen dap ni hte Wunpawng Mungdan Shanglawt Hpyen Dap KIA ni gasat poi byin wa ai majaw, Hpare mare kaw na hpyen koi yen wa ai ni re lam chye lu ai.
Hpare hpyen yen dabang hta htinggaw 173, hpyen yen mungshawa 1000 jan nga ai lam chye lu ai. Ya ten hpyen yen mungshawa ni law wa nna, dum n’ta nlaw ai lam mung nga ai hpe matut na chye lu ai.