Wunpawng Mungdan Shanglawt Hpyendap KIA Dapba 7 ginra Hpare mare kata hta nan, Wa company langai ga sau htu hpang nga sai majaw, mare masha ni ning hkap nga ai re.
Hpare mare grup yin bum marawn hkan htu sha ngut ai hpang, ya mare kata de nan matut htu shang wa ai majaw, lai wa sai April shata kaw nna, mare masha ni n gun madun ninghkap ai lam, shanglawt uphkang magam dap de laika bang ai hku nna shakut yu sai raitim, matut htu sha taw nga ai lam, Hpare ginra masha langai KNG hpe tsun dan ai re.
Lai wa sai May 30 ya shani, mare masha n kau hte ga sau htu ai kaw woi awn nga ai ni hkrum zup bawng ban ai raitim, KIO ginjaw masing re majaw, htu na hku ri ri rai taw sai lam, mung shawa ni hpe KIA lit nga ai ni bai nhtang tsun ai hpe chye lu ai.
N dai masa lam ni hpe, shimlam a majaw, mying n mai tsun ai zawn, n sen mung n mai lang ai ginra masha langai, laika hte KNG hpe n dai zawn tsun shana wa ai re.
“Hpare mare ginra hta Shanglawt asuya hte miwa ni pawng di na, Ga sau htu hpang nga sai, Hpare ginra masha ni gaw, n jaw galaw ai raitim, shanhte Sanat ni lang na galaw nga ai. lai wa sai bat kaw na re sai, mare the grai tsan ai shara hkan gaw htu sha ma ngut nna, ya gaw hpare kata kaw nan re sai.” nga nna laika hte KNG shiga dap de tsun dan ai re.
Wa company hte Shanglawt Dap hku nna, mare kata de gasau htu shang wa ai ten, mare masha ni hpe tsun shana, jahkrup ai lam nga ai raitim, mare masha ni n hkraw ai lam tsun ai re.
Ya chyawm gaw, mare masha ni n hkraw ai raitim, KIO ginjaw masing hte nga nna, htu na hku re sai nga dai ginra masha wa tsun ai.
Mare kata hta nan, ga sau htu na masing a majaw, ya kaba wa na ma ni a matu myit tsang ai gaw lam mi, ga sau htu ai Acid tsi a majaw, ginra kata hkai lu hkai sha mayak, sak hkrung nga pra lam hta dingbai dingna mayak amyu amyu hkrum sha wa na mare masha ni myit tsang nga ma ai re.
Hpare ginra hta ndai zawn gasau htu ai hte seng nna shinggan de shiga brawng ai lam, shiga jaw ai lam n galaw na matu ja ja sadi jaw da ai hpe mung chye lu ai.
Hpare mare gaw, Chyihpwi mare kaba kaw nna, lani mi sa ra ai rai nna, Miwa phone sha hkrang ai ginra langai re. Internet matut nlu ai majaw, dai ginra hta mung shawa ni gara hku hkrum sha nga ai hpe a ding tawk hkrum shaga na matu mayak lam ni nga ai re.
Pangwa hte Chihpwi ginra hta Myen hpyendap n pu pyihtusit hte jarit sin dap ni gaw, mungshawa kade ninghkap tim, gasau kam mara htu shaw tik tik rai taw nga ai lam ginra masha ni tsun ai re.
Dai majaw, shingra tara lamu ga yawng agung byin mat nna, hkashi yawng mung hten za nga sai lam Chihpwi ginra masha ni tsun ai.
Hpare ginra hta, lai wa sai 2020 ning kaw nna, Shanglawt ahkang hte Wa company ni gasau htu shaw hpang taw sai rai nna, ya 2 ning na sai lam chye lu ai.