May 14, KNG Radio

May 14, KNG Radio

KNG Radio Script

May 14, 2022

 

Miwa Mung kata bungli sa galaw na bai du shang wa ai Myen mung masha ni hpe Quarantine 5 ya tawn na lam lit nga ai hkam ja dap kaw na chye lu ai.

Kanpaiti kaw na shang wa ai ni hpe Kanpaiti Quarantine dabang hte Myitkyina Dakkasu jawng wang ni hta tawn na rai nna, Loi Je kaw na shang wa ai ni hpe Loi je Quarantine dabang the Manmaw Dakkasu jawng wang ni hta nhtoi 5 ya hkam la ra na re lam masat tawn ai re.

Covid shawng ningnan byin wa ai ten gaw Kanpaiti hta Qurantine 14 ya tawn ai rai nna, numdaw 2 lang bai byin wa ai hta 7 ya shayawm kau ai hpang,  ya numdaw 3 lang byin nga ten hta 5 ya hte masat tawn ai mung rai nga ai.

Ndai laman Miwa mung de bungli sa galaw ai Myen mung masha ni bai pru wa taw nga ai rai nna, Covid numdaw 2,3 lang byin wa ai laman Miwa mung kaw bungli sa galaw ai Myen mung masha yawng 24000 jan pru wa sai lam chye lu ai.

Ya na zawn Miwa mung kata Covid a majaw, Myen mung masha ni hpe bungli n jaw mat ai hte lockdown jahkring hkring jahkrat ai majaw, Miwa mung kata bungli galaw nga ai Myen mung masha ni lam shagu hta yak hkak taw nga ai re lam matut chye lu ai.

…………………………………………..

Manmaw Nmawk ginra ni hta Wan gumhpraw n bang ai n ta ni hpe wan di kau ya na hte, matut n jaw bang ai rai yang, Meter Box zing ai kaw na, tara jewat ai du hkra galaw sa mat wa na nga, Nmawk myithprap wan rung kaw na laika hte jahkrit sharim da ai lam chye lu ai.

Dai laika hta May praw 9 kaw na 15 ya n htoi 7 ya laman Meter wan gumhpraw n sa bang ai rai yang dai zawn ahkyak la mat na lam hpe, nmawk lawk hkan  Myen hpyen Myihprap wan rung na magam gun ni dai laika sa garan jaw da ai re lam ginra masha ni KNG shiga dap de tsun dan ai re.

Dai wan gumhpraw hpyi ai lam hta lai wa sai 2021 ning kaw na dai ning na shata man mali du hkra na wan  manu hpe hpyi da ai re lam matut chye lu ai.

Nta hting gaw 2000 jan nga ai nmawk mare hta ka ang hkup ram gaw Myen hpyen dap hpe hkawn n kam bang ai lam the lai was ai NLD asuya lakhtak Covid ladaw laman wan gumhpraw shayawm ya ai lawng lam ni a majaw Wan gumhpraw n bang byin ai re lam Nmawk mare masha ni matut tsun dan ai re.

N dai zawn tsun jahkrit wa ai majaw, Nmawk ginra masha n kau ya ten sa bang taw nga ai lam chye lu ai.

Manmaw muklum kata hta lai wa sai ten n dai zawn wan gumhpraw bang na matu laika hte tsun jahkrit wa ai lam nga yu sai rai tim, dai ni du hkra wan di kau ya ai lam the Meter box zing ai lam nnga ai nga Manmaw ginra masha ni dan ai re.

………………………………………………….

Dai hpawt manap e, Sagaing gira Yin Ma Pin ginwang တရော်ကျင်း mare hpe Myen hpyen dap ni kaw na mare wan nat jahten kau ya ai lam chye lu ai.

Dai mare n ta wan nat jahten da ai ni dai hpawt hkying 11 ram a ten du hkra hkru taw nna, n ta n kau hpe gaw shawa ni wan je sat taw nga ai lam matut chye lu ai.

Dai Myen hpyen hpung ni gaw dai mare wan nat kau da nna, Hkang Bum maga de bai lai lung mat wa ai lam ginra masha ni tsun da ai re.

Mung mare masha ni kaw na ya ten dai mare grup yin ni de gadai mung n gwi gawan yu hkawm shi ai majaw n ta gade ram hku mat, hten mat ai lam ni hpe tup hkrak rai n chye lu shi ai lam matut tsun ai re.

တရော်ကျင်း mare de sa wa ai Myen hpyen hpung ni lam lapran hta ding yang hkap gasat hkrum wa ai rai nna, dai တရော်ကျင်း mare de dai hpawt du shang wa ai hte ya na zawn n ta ni nat jahten kau ya ma ai re lam chye lu ai.

………………………………………………………………..

Kamaing Kawng ra hta jahkrat da ai Myen hpyen dap hte Pyi Thu Tsit pawng hpawm shagyit hpe PDF the KIA pawng hpawm dap ni kaw na May 13 ya shana maga sa nat jahten kau da ya ai re lam chye lu ai.

Dai shagyit hta lai sa lai wa mung mare masha ni hpe jahkrit shama san jep ai lam ni galaw taw nga ai sha n ga, gumhpraw hta sha ai lam ni mung ding yang galaw taw nga ai shara re lam chye lu ai.

Ndai zawn nat jahten kau hkrum ai hpang Kawng Ra mare makau grup yin de Myen hpyen dap Drone 2 hte pyen gayin hkawm wa sai lam matut chye lu ai.

Lai wa sai ten hta mung Kamaing hte Lawa mare lapran hta dung ai pawng hpawm shagyit hpe sa gap nat jahten kau ya ai lam ni nga wa ai rai nna, Pyi Thu Tsit hpyen la gap sat hkrum ai lam ni ding yang byin taw nga ai re.

Dai shana de sha, Nawng Lut ginwang နန့်ပတဲ hte လွဲမွန် mare lapran hta Myen hpyen dap Dapnu 33 hte KIA PDF pawng hpawm dap ni kasat hkat wa sai hta, Myen hpyen dap maga de na sum machyi ai law wa sai hpe Indaw PDF dap ni kaw na n dau da ai re.

Lak san lamang

Myitkyina mare, Panmmati hpyenyen camp hpe lamu ga madu ni htawt sit shangun taw ai sai majaw, Hpyen yen mung shawa ni kaga shara de htawt sit na lam the seng nna, mayak hkrum nga ai re.

Sun madu hte Hpyenyen ni shara shap ga shaga la da ai, 2023 september shata hta aten hpring sai re raitim, shara nnan bai tam na yak hkak ai lam Pammati hpyenyen camp kawa langai KNG hpe ndai zawn tsun ai re.

“ စာချူပ်ချူပ် da ai 5 ning hpring ai shaloi gara hku bai rai na kun? Ngu na anhte bai san ai shaloi  sun madu ni wang madu ni gaw, shanhte mung bungli kaga galaw na re nga tsun ai. Sun wang langai ngai ra taw ai, hpa majaw nga yang anhte ni mare de n mai wa shi ai, Project ni mung, lamu ga the seng na n nga ai re majaw, dai the seng na, anhte ye n lu wa shi ai ten, mung masa gara hku rai wa na kun, n dai kaw mung bai htawt ya u nga majaw, anhte hpyenyen ni myit yak nga ga ai.”

Dai ning laman sha, shara htawt shajin na matu 2 lang hta n yawm sa tsun sai raitim, Ja Gumhpraw naw yak ai majaw dang di ai mung shawa ni garum la na hpe mung myit mada nga ai re.

Asuya maga na mung, mare buga de wa nga na kun? (snr) dinghkrai kadai mung kade masing hte jinghku n ta wang hkan machyu na kun? Bai kaga shara jahkrat ya ai kaw mahtang matut htawt nga na kun? ngu ai lam ni hpe, 2 lang tsun wa sai lam chye lu ai.

Pammati hpyenyen mung shawa ni chyawm gaw, tinang mare de wa na lam sha myit daw dan tsun tawn ai majaw, dum n ta n lu wa shi ai laman, nga na mayak hkrum nga re lam matut tsun wa ai.

“Mung masa mung yak hkak nga ai re majaw, tinang mare de wa na, galaw lu galaw sha lu na matu mung yak ai, hpa majaw nga yang, n dai kaw ma ni a matu mung yak ai, tsang ai, hpaji lam hte seng na mung hpang hkrat taw sai, ya gara hku galaw na mung anhte myi di chyip naw re taw ai. Dai majaw hpa mi rai rai, 2022 ning laman, ginhtawng ye n htawng ai n dai laman anhte kaw gara hku rai wa na n chye ai. Ya na lamu ga the seng nna, gara hku galaw na kun ngu dai sha myit yak nga ga ai.”

 N dai hpyenyen ni gaw 3 ning daram Muga ginsum the yak yak hkak hkak marang yi lapran nga shalai wa nna, 2020 ning ram e she dum n ta atsawm gaw gap ya ai kata nga taw ai 2 ning sha naw raiyang, bai htawt sit ra na lam pru taw ai re.

Dum n ta wa na matu myit mada ai raitim, mung masa mayak lapran majan matut manoi byin nga ai majaw wa na naw myit tsang nga ai rai nga ai.

Ya ten hpyenyen camp kata hpyenyen mung shawa yawng marai 140 jan nga ai lam chye lu ai re.

N dai hpyenyen ni gaw, lai wa sai 2018 ning, Myenhpyen dap the Wunpawng Mungdan Shanglawt hpyendap KIA lapran majan a majaw Namati mare makau, Kasung, zup mai the Hka Nan mare hkan na hprawng yen wa ai ni rai nga ai.

Exit mobile version