Hpyen masa gaw maja ra, galaw lu galaw sha na lam mung yak hkak rai nga ai, Mungmyit Sinli, Mungbaw ginra hta lai wa bai bat 5 ya shani, shingra hpyen bai hkrum katut wa ai majaw, n ta hten, sum machyi hkrum mat ai mare masha ni a matu bai gaw gap na mayak mahkak byin taw ai lam chye lu ai.
Mungbaw ginra ni rai nga ai, Mungbaw, Man Nawng, Man hkawng, Nam Hkyet, Wing Seng dai ginra ni hta, lai wa sai April 15 ya shana de, n bung laru hkrum katut wa ai majaw, Dum nta ni hkra machyi mat ai mabyin hpe Man Nawng mare masha langai n dai zawn KNG Shiga dap de tsun dan ai re.
“Nbung laru sawng ai majaw, n ta num gaw ni, hpri hpraw ni yawng poi mat ai le. Dai n ta grawp mat ai ni gaw madu n nga taw ai, Mu sa taw ai ten hta byin mat wa ai hku re nga. Yi de, Kumshu yi hkan e she nga taw ai shaloi goi. Grai laja na n kau mi gaw grai hkrit kau ai ai hku rai nga. Hpun kaba ni daw agrawp mat wa ai the grai hkrit kau grai tsang kau hku rai nga. N bung grai kaba ai majaw le i.”
Dai shana de na n bung laru gaw, Man nawng kawng de grau laja byin mat wa ai rai nna, n ta law law hten hkra mat ai hta n ta 5 ram gaw sawng dik hten agrawp mat ai lam chye lu ai re.
Kaga mare ni hkan mung, hten mat ai n ta na ni nga ai rai nna, ya ten mare masha ni gaw byin mai ai hku, ginsum gap nna, gram rawng ra taw ai majaw, gaw gap lam hta yak hkak nga ai lam Wing Seng mare masha langai n dai zawn tsun ai re.
“Shanhte mi na dai Hpri pa mari kalai na matu mung, atsawm n lu re jang, dai gun galang mat ai hpri pa chyanyawp ni hte sha byin mai ai hku kapa nna nga taw ai ka re nga ai. Shawoi wo ra ten n byin ga ai gaw na sai law, tsawm ra ja ai ka re nga, dai shana de na n bung laru gaw. Nkau ni g aw hpri pa mari kalai ra tim, n lu mari ai kalai ai ka rai nga ai. Anyawp anyap re sha bai hta mara kalup mai byin ai hku le. Kaga mari gumhpaw mung bai n lu re ka rai nga ai.”
Mungbaw ginra hta nga ai mung masha ni gaw, Yi, sun, Hkau na law malawng galaw sha ai ni rai nna, Miwa ga jarit hpe machyu let, gun rai htaw shalai nna, kan bau bungli galaw taw ai ni rai nga ai.
Yak hkak ai lam amyu myu hkrum sha nga ai ten, ya na zawn shingra hpyen bai hkrum ai sha majaw, garum shingtau ai lam ra kadawn nga ai hpe n dai zawn matut tsun wa ai.
“Mai byin yang gaw, sawng mat ai hten mat ai, htinggaw ni hpe hpri hpraw zawn sha raitim lu mari ya yang gaw grai kaja na re ngu mu mada ai le. Ja gumhpraw mayak ni nga ai, ya anhte gaw ja gumhpraw tam na lam ma nhkrak, ngut jang mung masa ma n pyaw nam de n mai sa. Anhte mare gaw dai ni tam dai ni sha re ni rai nga ai. Yi sun, hkau na galaw sha re shara rai nga. N kau mi gaw nam de machyu let nam law nam lap di dut na, galaw sha ai ni law ai le. Dan re ni law ai re majaw hpyen masa shuk majaw nam de n mai sa mat jang gaw, yak hkak ai lam ni law law nga ai ka rai nga ai mare buga re ngu tsun dan mayu ga ai. Jahkring hkring hpyen masa gaw hkring mi rang my mi byin wa wa rai na. grai yak ai buga re. hpyen hkum hkra nga ai. Kokang ni nga ai, Shanglawt ni nga ai, Myenhpyen dap ni nga ai, ning re hkum hkra nga ai majaw, hpyen masa hte seng na, pyaw ai ngu n lu tsun ai, hkrum mi pyaw tim hkring mi bai kahtet wa wa re shara re.”
Mungmyit Sinli, Mungbaw ginra gaw, Muse a sinpraw hkran, mare kahtawng law law nga ai ginra langai rai nna, Myenhpyen dap the Kokang, KIA lapran majan masa dingyang kahtet nga ai shara re.