Sagain ginra, Hti Jaik mare uphkang salang yawng ngu daram gaw, lawk salang magam lit kaw nna pru mat sai lam chye lu ai.
Ginra daju mung shawa makawp maga hpung PDF ni a ga n madat ai lawk salang, U Kyaw Htu hpe PDF hpung ni sat kau ai mabyin ngut ai hpang, law malawng bungli pru mat ai rai nga ai.
Ya ten Hti Jaik mare kaba kata na lawk salang yawng ngu na daram bungli pru mat sai rai nna, Chyawk Aik hte Muk Wa Chyen ngu ai lawk 2 sha ngam sai lam, ginra masha ni KNG shiga dap hpe tsun dan ai re.
Hti Jaik mare kaba kata na, kahtawng hte lawk uphkang salang ni hpe, uphkang aya kaw nna lawan hkring na matu ginra daju PDF hpung ni kawn September 17 ya shani, ndau laika shapraw da ai lam chye lu ai.
Hti Jaik hta ya na zawn, gumshem hpyendap npu bungli galaw na lawk salang ni nnga mat wa sai majaw, shi a bungli masing yawng hten za ai maga rai sai lam ginra masha ni tsun nga ma ai re.
Hpyendap daru magam zing la kau ai hpang, shi a n pu na shi hpe sadi dung let bungli galaw nga ai lawk mare salang nkau sat hkrum ai lam ni, mungdan kata ding yang byin nga ai re.