Laiza mung shawa ni hpe Covid-19 ana jep ya na

Wunpawng Mungdan Shanglawt Asuya KIO ginjaw ginra Laiza kata na mung shawa mun mi jan hpe Covid-19 ana jep ya mat wa na re lam, Covid ninghkap komiti kaw na chye lu ai.

Je Yang hpyen yen dabang na amyu shayi langai hta July 26 ya shana Covid-19 ana mu ai hpang, ya na zawn Laiza ginra kata mung shawa ni hpe ana jep ya mat wa na re lam, Covid ninghkap komiti Dukaba Lahpai Heng Wawm ya na zawn tsun dan ai re.

“anhte laiza kata na mung shawa ni hpe ana kap nkap jep ya mat wa na. lawan dik ai hku na galaw mat wa na re.” nga nna tsun ai re.

Covid ana jep ai laman, Mare, Lawk ni de pru shang ai lam hpe ahkang n jaw Lock Down jahkrat da ai rai nna, bungli galaw ai ni mung Stay Home galaw ra na lam July 18 ya shani n dau dat ai re.

Ndai covid-19 ana jep ai lamang hpe miwa asuya maga de na mung sa du jep garum na re majaw nhtoi 4-5 ya laman ngut hkra jep ya mat wa na lam matut tsun dan ai re.

Ya ten Laiza mare hta si mai gat ni hpe ding yang hpaw taw da ai rai nna, kaga gat seng ni hpe gaw, jahpawt hkying 9 du hkra hpaw da shangun ai lam chye lu ai.

KIO uphkang ginra Mai Ja Yang hta Covid-19 positive byin ai masha ding yang matut jat taw nga ai rai nna, Laiza ginra kata hta gaw, n dai shawng nnan Covid-19 positive mu ai re lam chye lu ai.

Exit mobile version