Myotit Salawng Kawng post hpe Wunpawng Mungdan Shanglawt Hpyendap KIA hting nut kau ai hpang, Alaw Bum marawn Shang Htung Post maga de Myen hpyendap maga lagaw dap de bai lung wa ai majaw, majan laja lana byin wa ai lam chye lu ai.
Alaw Bum de lung wa ai Myen hpyendap hpe KIA maga bawm hte gap gasat ai majaw, si hkala ai lam law law nga ai lam ginra masha Myothit ginra masha langai ndai zawn tsun ai.
“Myen hpyendap ni Alaw Bum de lung wa ai kaw Anhte bum la ni a hkawm bawm gapaw la ai da. Dai kaw arum ara rai na gara hku di na pyi nchye mat ai da” nga nna ginra masha langai KNG shiga dap de tsun dan ai re.
Dai Myen hpyendap wuhpung gaw Alaw Bum marawn e chyat rawng nga ai, shanhte a hpyen dap hpe sa garum na matu malu masha nkau gun lung wa ai re hpe mung chye lu ai.
Myen hpyendap gaw tat sum kau ai Alaw Bum hpe bai lu na matu, hpyen n-gun kaba hpe Myotit, Kunglaw maga de sa da ai lam chye lu ai.