Myen hpyen dap hpe ning hkap, gum lang ai lam n galaw na matu hpyendap shangun dat kasa Duwa Hkyet Hting Nan a Putau hkrunlam hta makam masham hte htung hking hpung ningbaw ni hpe zin lum nna tsun ai lam chye lu ai.
April 26 ya shana daw Putau e hkrum zup ai shaloi, makam masham wuhpung yawng a matu gumhpraw sen 20 hte htung hkring hpung yawng a matu gum hpraw sen 15 jaw nna ya na zawn tsun ai re lam chye lu ai.
Hpyendap gaw 2008 gawda tara npu daru magam hpe jahkring mi gang jum da ai she re majaw, hpyendap hpe gum lang ninghkap ai lam n galaw na matu, Duwa Hkyet Hting Nan tsun ai lam, dai hkrum zup hpawng hta shanglawm ai salang langai ndai zawn tsun ai re.
“shi tsun ai gaw, daru magam lit hpe zing la ai n re. Gan makawp ya ai she re da. Laning mi hpring yang, ra lata poi bai galaw ya na nga na tsun mat ma ai. Dai majaw hpa ning hkap taw n ra ai da. Shanhte tsun ai hpe yu yang gaw wa zinlum ai lachyum re ngu mu ai” nga nna tsun ai re.
Hpyen dap san da ai Jinghpaw mungdaw uphkang salang ningbaw Duwa Hkyet Hting Nan a shawng ningnan lang na mungshawa ni hpe hkan zim lum ai Putau hkrun lam re hpe chye lu ai.
Putau ginra mung mungdaw kata kaga mare kaba ni zawn sha, hpyen gumshem asuya hpe ninghkap n gun madun ai nga ai re.