Dum nta wa mai sai nga nna, hpyen yen ni a myit ra lam hta shinggyin na matu asuya maga galaw wa ai lam gaw shatin ai lamang sha re nga nna, hpyenyen ni tsun ai re.
Ya ten ginra nkau hta shimlum sai majaw dum nta wa mai sai rai nna, ta tut hta hpyen yen ni a myit ra lam hpe san shinggyin ya na matu hpyen yen dabang lit hkam ni hpe asuya uphkang rung kaw nna laika hte matsun da ai hpe chye lu ai.
Myen asuya hpyendap hte wunpawng mungdan shanglawt hpung KIO lapran hkam lahka nga ai gap hkat jahkring lekmat nhtu shi ai sha, dum nta wa na matu gara hku mung nmai byin ai nga nna Dalaw na hprawng yen nna, ya Jan Mai Kawng Catholic dabang hta shingbyi nga ai Srn Roi Ja tsun ai re.
Hpyen yen ladaw na wa ai majaw tinang buga htingbut htingra sum machyi na hpe tsang ai raitim, ya na mung masa kata hta dum nta n gwi wa shi ai lam Namsan yang mare na Sara Seng Hkawng tsun ai re.
Raitim, ya ten Myitkyina-Manmaw lam ntsa Nam san yang mare masha 100 jan gaw dum nta wa magang sai re.
Bai nna Dabak yang zawn lam nmaw makau mare masha ni mung dum nta wa mayu ai lam asuya hpe laika bang da ai lam chye lu ai.
“Dabak mare ni gaw shanhte nta wa mayu ai lam htinggaw 33 anhte hpe laika bang da ai. Dai majaw anhte gaw htawt sit asuya komiti bai hpaw nna, shanhte a lamu ga, arung arai jahpan ni hpe jep nna, teng ai rai yang, seng ang ai masing ni jahkrat lu na matu Jinghpaw mungdaw asuya hpang de laika bai htang ai re.” nga nna hpyen yen ni a myit ra lam hta shinggyin nga ai Waimaw Ginwang asuya uphkang salang Tun Tun Jinghpaw Shiga Dap KNG de tsun ai re.
hpyen yen ni a myit ra lam chye lu hkra dabang ni de sa du gawan na matu, asuya hte Jinghpaw hpyen yen lakawn lanawn komiti KHCC lapran lai wa sai July shata Naypyitaw bawngban hpawng hta e myit hkrum da ai re.
Raitim, ya na zawn asuya uphkang rung maga tau hkrau mying jahpan hta ai lamang ni gaw KHCC a lamang nre nga nna ningbaw Rev.Dr. Hkalam Samson tsun ai re.