Jinghpaw mungdaw majan 8 ning hpring, lam n’maw makau hpyen yen ramma ni a hkam sha lam hpe htawng madun ai majaw tara jewat da hkrum ai ramma ningbaw 2 hpe, du na September praw 2 ya shani tara je yang sa na re lam chye lu ai.
Dai ni 11 lang na tara rung san jep n’htoi hta, tara agyi wa hku nna hpang na bat hta jahtum tara je yang na matu bai shaga da ai lam tara jewat da hkrum ai Shy. Seng Nu Pan tsun ai re.
June praw 9 ya shani ang ai majan 8 ning hpring n’htoi e, Myitkyina mare kaba Sein Mya Eya nampan sun hte Pyithuyinpin shara 2 hta hpyen yen ramma ni a hkam sha lam hpe mahkawn hte lamang madun mat wa ai re.
De a matu seng ang ai asuya hpe ahkang nhpyi ai nga nna, woi awn ai Shd. Paw Lu hte Shy. Seng Nu Pan hpe Myitkyina ginwang pyada du Min Thant Zaw kaw nna ‘masha hpawng chyawm ai tara kanu masat 19’ hte tara jewat da ai rai nga ai.