Lai wa sai lahkawng ning jan, Jinghpaw Mungdaw Hpakan ginwang kawn tsang 9 jawngnum sha Shy. Ja Seng Ing si ai manghkang hpe shawk shawn ai kawa; Slg. Brang Shawng tara dara sum mat nna February 13 ya shani htawng dam; shata 6 snr gumhpraw dam; kyat 50,000 jahkrat dat ai nga Slg. Brang Shawng kawn tsun ai.
Hpakan ginwang Maw Wan mare lawk (1) Sut Ngai Yang mare kawn asak 14 ning Shy. Ja Seng Ing si mat ai manghkang hpe kawa wa nan shawk shawn da ai nga Myen asuya dap kawn nhtang shawk da ai hta tara rung dung lang 55 lang kaw Hpakan Ginwang Tara Rung kawn Tara Kasa Slg. Htun U kawn amying jahkrat dat ai lam rai nga ai.
“Shanhte tara dara dang mat ai. Anhte maga dara sum mat ai nga! jahkrat dat ai re. Anhte hpe shawng na rung dung ten e shawk shawn lam sha mara mu nga tsun ai majaw anhte mung shawk shawn lam sha mara na shadu ai. Dai shani, shani ting la da shangun nna shana daw hkying 3 chyen daram hta shaga nna Slg. Brang Shawng hpe amying jahkrat na nga nna amying jahkrat dat ai” nga Slg. Brang Shang tsun ai.
Ya na zawn amying jahkrat dat ai lam gaw tara rap-ra ai je yang dawdan lam n re majaw myit n dik ai lam tara kasa Slg. Htun U hku nna mung yak yak hkak hkak dawdan nhtawm ntsa na matsun hte maren amying jahkrat dat ai re nga shi kawn tsun ai.
Htawng dam shata 6 snr gumhpraw dam hta na dam gumhpraw kyat 50,000 hpe sha jaw da nhtawm kade n na yang tara rung tsang hte tsang de pahkam hkam shang mat na re lam matut tsun ai.
Lai wa sai 2012 ning September 13 ya e Shy. Ja Seng Ing si mat ai hpang October praw 1 ya shani hta kawa Slg. Brang Shawng gaw Myen asuya hpyen dap a gap dat ai pala hkra nna si hkrum mat ai majaw Myen Mung shinggyim ahkaw ahkang komishin de shawk shawn ai lam hpe n teng n man shawk shawn ai ngu Myen asuya dap kawn Dukaba Za Ni Min Pai gaw upadi puk-ma 211 hte rung nhtang shawk da ai re.
2013 ning April praw 8 ya shani kawn manghkang hpran na matu tara rung de rung shawk wa; Za Ni Min Pai gaw tara rung de shawng ningnan lang na rung dung shani e sha sa du nhtawm Shy. Ja Seng Ing si ai manghkang gaw Wunpawng Mungdan Shanglawt Hpyen Dap (KIA) bawm a majaw si ai lam re nga tara rung hta tsun shapraw mat ai.
Dai hpang tara rung kawn lang hte lang htet shaga mat ai raitim n sa du ai sha 2 ning na ai hpang, daining January shata na rung dung lang 50 lang ngu na rung dung nhtoi hta she rung shawk wa; Dukaba Za Ni Min Pai gaw nambat 2 lang lung ngut ai hpang February 13 ya shani hta amying jahkrat dat ai lam rai nga ai.
Slg. Brang Shawng gaw kasha si ai manghkang hpe mabyin teng sawk shapraw ya na matu komishin langai hpaw let sawk shapraw ya na matu Yangung mare e Shiga sanglang hpawng galaw nna hpyi shawn mat sai rai nga ai.