Hkahku Mung nbung hpyen hta dum nta hte IDP dabang htenza

March 16, 2019 sin marang nbung laru a majaw Um Hta ga dum nta ni htenza

Sumprabum ginwang Hkahku Mung de bat Kru Ya shani byin ai sin nbung laru a majaw dum nta, nawku jawng hte hpyen yen dabang ni htenza hkrum sai re.

Mali Hkrang Walawng, Um Hta ga hta Buga Hpung Rung hten run mat nna, asak 80 grup yin gumgai Htingnan jan n lu hprawng nna mashi hkala machyi hkrum ai lam na chye lu ai.

“Mawdaw lam yak hkak ai a majaw Mungdaw asuya (snr) KBC hte garum ningtum hpung ni hpe garum hpyi mat na re” nga nna Jinghpaw Wunpawng Hkalup Hpung Ginjaw, KBC Hkahku Mung Ginwang amu madu Hpung-up sara Sana Yaw tsun ai re.

Um-Hta-church.jpg
Bai nna Mali Hka sinpraw hkran Salang Yang mare hpyen yen (IDP) dabang hta mung nta 4 dang hten sum mat ai lam chye lu ai.

Ya yang mare masha ni hta plastic galup pa hte jahkring jahka shingbyi na ginsum nta ni hpe hkyak hkyak ra ladawn nga ai lam Hpung-up wa tsun ai re.

March 16, shana de hkying 6 grupyin e sin marang kapyawn ai laru a majaw Um Hta ga hta dum nta ni hten za nna, mam dum daw agrawp mat ai a majaw mam ni marang hkra nna yak hkak jamjau hkrum nga ai lam matut chye lu ai re.

Laru a majaw htenza mat ai mare kahtawng hte dum nta jahpan ni kata lam shiga n lu shi ai re.

Ya na zawn nbung hpyen hkrum ai ginra de Myitkyina kaw na Mali Hka lam jakli hte sha hkawmsa mai ai re. Lung de 3 ya hte yu wa de lani mi, na ai lam chye lu ai.