US bawm jahkrat pyenli kaw na Rasha hka dap gap shaman

US B-52 bawm jahkrat ai pyenli kaba

US B-52H Stratofortress, zai ladat bawm jahkrat nbungli kaba langai gaw Rasha a Baltic Panglai na hka dap hpe gap gasat ai hkrang shala shaman shakyang ai lam galaw dat sai hpe Defence Blog shiga hta mu lu ai.

US Nbung Dap a zai ladat bawm jahkrat ai pyenli gaw Rasha a kanu mung shinggan Kaliningrad mare hte deng 93 (150 km) du hkra ni kahtep pyen wa ai nga, Rasha Makawp Maga Hkringmang Dap kaw na daini tsun shateng ai.

"16:25 Moscow aten. US Nbung Dap Boeing B-52H Stratofortress zai ladat bawm jahkrat pyenli, jahpan masat hti hkum 61-0009, gaw Rasha Baltic Hka Dap hpe bawm jahkrat chyam ai hkrang shala mat wa masai" nga, nbung lam htinglet hkridun Plane Radar a Twitter kaw March 15 hta ndau ai.

B-52 gaw asak kaba dik pyenli langai rai nhtawm ya ten du Nbung Dap hta naw jai lang nga ai re. Vietnam majan ladaw kaw nna majan hpyen man shagu hta Stratofortress bawm jahkrat ai pyenli ni hpe jai lang nga ai re.

Kaliningrad
Ya ten B-52 hpan pyenli ni hpe madang sharawt gram lajang ai hta, anem sha pyen ai lam, yu maya bawm jahkrat ai lam, pyen lu ai tsan shadang jat ai lam hte, hkap hkan hte htim gasat laknak hkinghku htaw ai madang sharawt ai---- ballistic hte cruise missile ni hpe deng tsa kahtap tsan ai shingte shara hpe gap lu na matu, madan shatawt tawn ai re.

B-52H Stratofortress gaw ngarai laknak ni (nuclear weapons) hpe htaw nna gap lu ai atsam nga ai re.

Ya chye lu ai shiga hte maren, B-52H bawm jahkrat ai pyenli ni gaw tsaw dik pe 50,000 pyen lu nna ngarai bawm chyubaw dawsa pala ni snr yu maya bawm ton 35 (70,000 pounds) lu htaw ai re.

Ya jai lang nga ai B-52H bawm jahkrat ai pyenli ni hpe lai wa sai 1961 hte 1963 lapran galaw shapraw ai rai nna, 2040 du hkra matut jai lang na maram lu ai. Dai hpang shi a malai ya galaw nga sai B-21 Raider bawm jahkrat ai pyenli n'nan ni hpe galai lang wa sana re.