IDP nhtang wa lam hta KHCC gaw KIO, asuya yan hte san san jahkrup na

Sara Hkalam Samson, KHCC Ningbaw

Jinghpaw IDP, hpyen yen nu wa ni dum nhtang wa na mahkrun hta KIO hte Myen asuya yan hte, Jinghpaw hpyen yen zinlum komiti KHCC ningbaw ni, san san sa jahkrup ai lam hpe ndai bat galaw hpang sana re.

Shawng n’nan, Laiza KIO ginjaw hte hkrum shaga ai lam hpe ndai bat Mali Ya, March praw 7 ya shani galaw na re nga, KHCC Ningbaw, Jinghpaw Wunpawng Hkalup Hpung Ginjaw, KBC Ningbaw, Rev. Dr. Hkalam Samson tsun ai.

Dai hpang, Myen asuya NRPC (National Reconciliation and Peace Center) salang ni hte gaw ndai shata ka-ang hkan e hkrum byin na re nga, Sara Samson tsun ai re.

Ya ten KHCC hkyen nga ai hte seng nna, "E.. anhte gaw lahkawng asuya pahkam i... Shanhte myit hkrum ai lam nga ai shara kaw gaw wa na matu hkyen da ga ai,” nga Rev. Dr. Hkalam Samson, Jinghpaw Shiga Dap KNG de tsun ai.

Jinghpaw hpyen yen ni dum nta nhtang wa ai hta Uropa Munghpawm EU hte Japan Nippon Foundation yan garum ntum jaw na re lam lai wa sai February shata Yangon kaw Kachin Humanitarian Concern Committee ning ni hte hkrum ai shaloi, ga sadi jaw wa sai re.

February 19 ya shani hta KHCC gaw Waimaw hte Myitkyina kaw nga ai hpyen yen dabang kanu kawa ni hte Myitkyina kaw hkrum nna dum nta nhtang wa na mahkrun bawngban ai lam galaw ai re. Hpyen yen ni yawng gaw dum nta nhtang wa mayu ai lam KHCC ningbaw tsun ai re.

Maning kaw nna Myen asuya hte hpyendap gaw hpyen yen dabang ni hpe dawm kau na matu mawmawn galaw wa ai rai nga ai.

Dingdung Daw Daphpawm hku nna KIO gaw Myen asuya Simsa Lam Komashin (Peace Commission) hte Miwa mung Hkwi Ming (Kunming) kaw February 25 hta hkrum ai shaloi, bi-lateral gap hkat jahkring sen htu ai hte hpyen yen dum nta nhtang wa ai lamang hpe jawm jahkrup galaw na matu, laika hte mung asuya hpe tang madun sai lam, KIO ginjaw salang ni tsun ai re.

Dai zuphpawng kaw, January praw 4 ya shani Rahkai mungdaw kaw byin ai AA Rahkai Dap a gap gasat dat kaw nna asuya gaw Dingdung Daw Daphpawm hte bi-lateral gap hkat jahkring na lamang hpe dawm kau sai re lam tsun wa ai hpe chye lu ai.

Dai re majaw, April shata Myen hpyendap a shata-4 majan jahkring ai ladaw n htum shi yang, KIO hte asuya lapran bi-lateral gap hkat jahkring lu na masa bai tsan mat nna hpyen yen ni dum nta nhtang wa lu na myit mada shara mung, bai tsan mat wa ai masa rai nga ai re.