Kunming zuphpawng kaw na KIO dat kasa hpung bai du wa

Kunming zuphpawng kaw na KIO dat kasa hpung bai du wa

Miwa mung Kunming kaw Myen asuya simsa lam komashin hte sa hkrum shaga ai, KIO dat kasa hpung, daini tinang ginjaw Laiza de du wa sai re.

Daining shawng n’nan lang, asuya Simsa Lam Komashin hte Dingdung Daw Daphpawm dat kasa ni February 25 ya shani ‘ntsa lam’ hkrum shaga ai shaloi, daphpawm hpe Wunpawng Mungdan Shanglawt Hpung KIO woi ningbaw ai re nga KIO ginjaw salang ni hku nna chye lu ai.

Feb. 28, bat Mali Ya shani hkying 1:30pm ten KIO Ninggawn Amu Madu Salang Kaba Kumhtat Hting Nan woi awn ai ginjaw dat kasa ni Laiza de du shang wa ai shaloi, hkap hkalum let akyu hpyi la ai lamang galaw ai re.

Bat Langai Ya shani Myen asuya simsa lam komashin hte hkrum hkat ai zuphpawng sumtang hpe tang madun ai lam garai n galaw shi ai re.

Zuphpawng n galaw shi ten, KIO maga hkyen lajang ai gabaw ni hta, ‘mungmasa bawngban na mahkrun tam na lam’ hte ‘shim lum ai hte hpyen yen ni dum nta nhtang wa na lam’ lawm ai nga, Laiza KIO Shiga Htawn Shana Dap lithkam Dukaba Nhpang Naw Bu, Jinghpaw Shiga Dap KNG de tsun wa sai re.

Feb. 25 Hkwi Ming (Kunming) zuphpawng mahtai hte seng nna shiga shabra ai lam n galaw ai re.

Dai zuphpawng hta, asuya simsa komashin de na ningtau ningbaw Slg. Ting Zaw hte amu madu hpyendu usa Lt-Gen Hkin Zaw U shanglawm ai re. Tatmadaw hpyendap na dat kasa n lawm ai re.

Mungdan kata hta ni hta na simsa lam a matu yaw shada ai nga nna, Myen hpyendap gaw Jinghpaw hte Sam mungdaw lahkawng kaw shata 4 majan jahkring ai lam, maning December 21 hta ndau dat sai re. Dai zawn ndau tawn ai ten, hpyen n-gun jat ai lam ni dingyang galaw nga ai re.

Feb. 26 ya shani, madung lusha jarik hte laknak htaw ai hpyen mawdaw 100 daram gaw Myitkyina Dingdung Daw Daju (M.P.Hk) kaw na Putau de lung wa sai. Shawng e January 28 hta gaw madung hpyenla htaw ai mawdaw 100 daram mung Myitkyina kaw na Putau de hpyen n-gun jat tawn sai re.