Munggu Yingla Bum kaw Myen hte Kokang gasat gala byin

Kokang dap ni, Munggu, Lahta Sammung

Lahta Sammung, Munggu Wunpawng Mungdan Shanglawt Hpyendap KIA Dapdung 36 ginra Yingla Bum kaw, daini Laban Ya shani Myen asuya dap hte Kokang dap lapran ningdaw lahkawng lang gasat gala majan byin ai lam chye lu ai.

Hkying 12:00pm daram hta, Yingla Bum na Dingdung Daw Daphpawm malawm, Kokang MNDAA Dapdung 501 hpe dai bum kaw daju ai Myen hpyendap ni shawng sa htim gap ai majaw, aten hkying hkum mi daram hte ningdaw lahkawng lang, gasat gala majan byin ai re nga, Munggu KIA shiga lawk tsun ai.

Myen dap maga Dapnu (tat-ma) 11 hpe ndai laman wa galai ai Dapnu 99 ni rai na re lam maram tawn ai re.

Matut nna gasat gala lam ni byin wa na masa nga ai lam ginra masha ni hpe lakap let chye lu ai.

Hpawt ni, February 25 hta simsa lam hte seng nna Myen asuya NRPC dat kasa hpung hte Dingdung Daw Daphpawm hpung mali (KIA, TNLA, MNDAA, AA) lapran, daining shawng n’nan lang Miwa, Yunnan mungdaw Kunming mare kaw ‘ntsa lam’ hkrum shaga hkat na re. Ndai zuphpawng a lani mi shawng kaw ya na zawn asuya dap hte Kokang dap yan gasat gala lam byin wa ai re.