Jinghpaw pati ni hpe sut nhprang polisi ningmu jahpaw ai lam galaw

Jinghpaw pati ni hpe sut nhprang polisi ningmu jahpaw ai lam galaw

‘Jinghpaw mungdaw lamu ga jarik ni hpe gara hku polisi tara ni hte hkrak jahkrat ra ai lam hpe hparan chye na matu’ yaw shada ai Jinghpaw pati ni hpe alak mi ningmu jahpaw sharin hpawng hpe Myitkyina kaw galaw lu sai re.

Kachin Democratic Institute (KDI) woi awn ai hte lahkawng ya bawngban hpawng hpe Learning Center-Myitkyina kaw mani galaw shangut ai re.

“Jinghpaw mungdaw na nhprang sut rai ni hpe tara rap ra ai hku jai lang chye lu na matu yaw shada na ndai hku yawng pawng hpawng nna galaw ai lam re” nga nna KDI lithkam Dr. Gumgrawng Hkan Naw tsun wa ai.

‘Resource Federalism’ gabaw hte madung bawngban ai lam hpe Amerikan mungdan Washington DC daju Forest Trends na Mr. Kevin Woods woi awn ai re.

Jinghpaw pati pawng hpawng hpung malawm (UDPKS, KDP, KSDP), hte KNC na salang yawng 22 sharin hpawng de sa du shanglawm ai lam chye lu ai.

Matut nna “Masha law law a matu akyu jaw nna, masha loi mi sha ngamu ngamai taw ai hku n byin wa na matu bawngban ai re” nga, Dr. Hkan Naw tsun ai.

Ndai zawn ningmu jahpaw bawngban lamang ni hpe matut galaw sa wa na re lam chye lu ai. Hkyen da ai gabaw ni hta--- tara upadi kaup gahpwi lam, federal gawda ai tara lam, ramma ningja gaw sharawt ai lam hte shingra tara makawp maga lam ni, rai na lam chye lu ai.

KDI gaw Myitkyina, Du Kahtawng kaw Ningmu Jahpaw Ginra (Learning Center) hpe ndai shata February 5 Rawt Malan Nhtoi hta hpaw dat sai re.

KDI hpe Matsat Mali Jinghpaw jawngma ningbaw ni, hpaji kung hpan ai ni hte nawku hpung woi ni shanglawm let 2015 hta hpaw ai re.