Hpakan rudi ni ‘Mungnawk Hkawng Uru Rudi Ruhpang Hpung’ hpaw

Hpakan rudi ni ‘Mungnawk Hkawng Uru Rudi Ruhpang Hpung’ hpaw, Feb. 18, 2019

Hpakan jauman rudi masha ni gaw, tat sum ai tinang a lamu ga hte tinang a ahkaw ahkang bai lu hkra myit mang let ‘Mungnawk Hkawng Uru Rudi Ruhpang Hpung (snr MUR) hpe ndai bat pru hta hpaw ninghtan dat sai.

February 18 ya shani, rudi masha ni Hpakan Hkalup Hpung wang kaw hkrum zup nhtawm ndai MUR hpe hpaw sa wa ai re. Wuhpung ningbaw Hpungtau Hkum Seng Naw ndai zawn Jinghpaw Shiga Dap KNG de tsun ai.

Lamawng-La-Tawng.jpg
“Anhte Mungnawk Hkawng Uru Ga jauman rudi masha ni jet ai sari sadang hte hkrak nga pra lu na matu re. Rudi masha ni a galaw lu galaw sha nga pra lam hkrak wa na matu tat sum ai ahkaw ahkang yawng bai lu la hkra asuya hpe tang madun na re. Tengman ai labau ni madun nna shawng de lahkam sa wa na dawdan ai.”

Ndai MUR hpe n hpaw shi yang, woi ningbaw ni gaw Lawnghkang, Hpakan hte Seng Tawng shara masum kaw shawng rudi masha ni hte hkrum bawngban ai lam galaw ai re.

Shawng de Gumchying Gumtsa Prat Hpakan Uru Sengmaw Ga hpe Laisai Du ni shawng uphkang nna dai hpang, Ginsi Du, N’ja Du, Jengreng Du hte Lamawng Du ni uphkang lai wa nna ‘Mungnawk Hkawng Uru Ga’ ngu tsun shamying ai re.

Hpakant-jade-mine.jpg
Raitimung 1948 ning Myen mung shanglawt lu ai hpang ya ten du hkra, manu dan ai Hpakan lungseng pru shara a lamu ga madu ni gaw asuya daru magam lu ni a n gawn n sawn di ai hkrum sha nga ai re.

“Lai sai ten anhte a lamu ga hta Sharaw, Hpawlam du hkra nga lai wa sai. Ya hpa mung n nga sai. Maling mala ni yawng krin mat sai. Anhte a ahkaw ahkang hpe lam amyu myu hku hpyi wa na re. Hpyi ai lam, tang madun ai lam n nga yang du na 5 ning, 10 ning hta anhte a lamu ga n nga mat sana re. Shanhte a ga sumpum kaw hpa hkai sha mai sana n re. Ndai hpe makawp maga na matu rudi masha ni nan woi galaw ra na re,” nga Hpakan Amyusha Zinlum Hpung na Sara Lamawng La Tawng tsun ai.

1994 ning Myen hpyendap asuya hte Wunpawng Mungdan Shanglawt Hpung KIO lapran, simsa lam sen htu ai hpang kaw nna, Hpakan ga de company ni shang wa nna manu mana kaba ai prat dep nhprang htu jak kaji kaba ni lang nna lungseng htu sha wa ai gaw ya aten du hkra re.

Nhkun gyi kaput ai, ga bum gyi ai hte Lanam Ta ten Ura Hka kaba ai manghkang ni majaw mung, lamu ga hten za nna masha si hkrung si htan lam ni shaning shagu grau grau law wa ai re.

Rudi jauman masha ngu ai hta, lai wa sai 400 ning jan kaw nna Mungnawk Hkawng Uru Ga kaw nga ai ni hpe tsun ai re.

Uru Sengmaw Ga mare mying ni gaw moi shawng na maumwi mausa mabyin teng ni hte shamying da ai hpe ya ten Myen, Sam mying ni hte galai shamying kau ai lam nga ai re.

Dai ni hta nkau gaw--- Mawmau Layang hpe ‘Mawmau Shan’, Gwi Hka hpe ‘We Hka’, Lawnghkang makau Sha-it Yang hpe ‘Lay Pyin Ywar’, Kaseng Bum hpe ‘Hpa-ya Tawng’ ngu galai shamying ai re.

Hpakant.jpg
Myen asuya ahkaw ahkang lu ni hku nna mung sut nhprang hte seng ai tara upadi ni ka lajang ai ten, Hpakan lamu ga madu rudi masha ni hte bawng jahkrup ai lam hpa n galaw ai re.

“Tinang a ahkaw ahkang hkrat sum sai. Tinang lamu ga hpe n lu makawp maga sai. Dai re majaw tat sum ai dai ahkaw ahkang ni bai lu la hkra ndai ginra hpe uphkang lai wa sai anhte rudi masha ni gahkyin gumdin let ya na zawn lam tam shakut wa ai re,” nga Duwa Laisai Mung Ra tsun ai.

Dai re majaw du na August shata Mungdan Gadaga Rudi Ruhpang Masha Masat Nhtoi hta Hpakan jauman rudi masha ni hku nna shamu shamawt lamang galaw na hkyen nga sai re.

Matut nna, Mungnawk Hkawng Uru Rudi Ruhpang Hpung (MUR) gaw Hpakan Uru Sengmaw Ga a rudi masha ni a lam Madun Htingnu (Museum) langai hpe galaw sa wa na re lam chye lu ai.