Jinghpaw mungdaw ginra 6 kaw ja htu ahkang jaw

Hkringmang Dashi La Seng, Mungdaw Sut Nhprang Dap

Jinghpaw mungdaw ginra 6 kaw tara shang kaji ai madang hku ja htu sha lu na ahkang hpe Mungdaw asuya jaw dat sai re.

Waimaw, Machyangbaw, Sumprabum, Shingbwi Yang, N’mawk hte Shwegu ginra ni hta company 18 hpe ja htu lawk kaji 58 hte lata hte htu sha shara lawk 2 hpe tara shang jahkrat ya ai lamang, February 20 ya shani Myitkyina Sut Nhprang Dap rung lakying e galaw wa sai.

Ja hpe kaji ai madang hku hte ta hte htu sha mayu ai ni gaw Jinghpaw Mungdaw asuya hpang de tang madun wa ai majaw shi a galaw nga ai hkrang hte tara upadi hte maren ahkang jaw ai re nga, Sut Nhprang Dap Hkringmang Dashi La Seng, ndai zawn tsun ai.

“Shanhte tara shang tang shawn wa ai hpe shi a galaw nga ai hkrang hku ja htu lawk ni hpe anhte jahkrat ya ai re. Yawng hpe upadi kata kaw galaw ya ai rai nga ai. Madung gaw tara n shang galaw sha ai ni law wa ai majaw ndai zawn tara shang masa galaw ya ra wa ai re. Tara n shang galaw sha masha law ai majaw makau grup yin shingra tara hten za ai lam grai law ai. Dai hta n ga mungdaw asuya a sari mung jahpyak ya ai re. Dai re majaw yawng hpe upadi kata atsawm galaw shangun mayu ai re.”

Kaji ai madang hku hte ta hte dang lu ai made nhprang htu sha mayu ai ni hpe asuya kaw na ahkaw jaw na re majaw tara n shang htu sha ai ni hpe mu yang tara upadi hte mare ja ja ahkyak la sa wa na re nga, shi matut tsun ai.

Jinghpaw mungdaw kata nga ginwang yawng 18 hta, ya ginra 6 kaw kaji ai madang nhprang htu sha na ahkang jaw sai re majaw ngam ai ginra ni mung tang madun wa yang, jep jen nna galaw ya na re lam chye lu ai.

Mungdaw asuya kaw nna, ya na zawn kaji ai madang nhprang htu sha na ahkang jaw ai gaw ndai lang hte 2-lang rai sai lam chye lu ai.