Amyu baw laika sharin sara ni hpe Amyu Baw Hkringmang Dap ading tawk lata sana

Amyu baw laika sharin sara ni hpe Amyu Baw Hkringmang Dap ading tawk lata sana

2019-2020 hpaji ladaw kaw nna, Jinghpaw mungdaw asuya hpaji jawng ni hta amyu baw laika ni sharin ya na sara ni jep jen hkap la ai lamang hpe Amyu Baw Hkringmang Dap kaw na ading tawk lit la galaw sa wa na re.

Ndai lam hte seng nna Jinghpaw mungdaw Hpaji Dap ningtau lithkam U Tan Htun ya na zawn Jinghpaw Shiga Dap de tsun ai.

“Ndai hpe shawng kaw na Amyu Baw Hkringmang Dap galaw ra ai bungli re. Raitimung myu mare ni kaw Amyu Baw Magam Dap ngu ai ya she hpang wa ai kaw n hkum tsup shi ai majaw anhte Hpaji Dap kaw na shang garum taw ai re. Raitimung dai ning chyawm gaw jep jen ai hkap la ai yawng hpe Amyu Baw Hkringmang Dap lit la wa sana re.”

Shawng de gaw, amy baw laika sharin sara ni hpe Amyu Baw Hkringmang Dap jep jen da ai hpe Mungdaw Hpaji Dap rung kaw nna amu hkap la ai lam galaw ai rai nga ai.

Yan a zawn sharin sara hkap la na ladat galai shai ai lam ntsa Amyu Baw Laika Laika Hpung na Slg. Lalaw Gyung Lum ndai zawn tsun ai.

“Anhte ni a matu ya na zawn Amyu Baw Hkringmang Dap kaw na ading tawk shatsam na re majaw bungli galaw ai grau tang du wa na. Asan sha rai mat ai ga le. Hpaji Dap hpe bungli majoi shangun ai re.”

Ya ten Jinghpaw mungdaw e amyu baw laika sharin ai sara yawng 800 jan nga ai lam chye lu ai. 2015 kaw na sharin hpang wa ai amyu baw laika ni hta Jinghpaw amyu lakung 6 hte Sam amyu lakung 5 a laika ni lawm ai re.