Asuya hte Dingdung Daw Daphpawm hkrum na nhtoi, bai sit

KIA Dap 6 hpyen hpung, Hpakan

Rahkai mungdaw kaw majan laja lana byin nga ten, Wunpawng Mungdan Shanglawt Hpung KIO shanglawm ai, Dingdun Daw Daphpawm na hpung mali hte Myen asuya NRPC lapran, dai ning shawng n’nan lang hkrum hkat na lamang nhtoi bai sit kau ai majaw, galoi bai hkrum na n chye shi ai re.

January 21 ya shani, Miwa mung Kunming Mare kaw NRPC hte KIO dat kasa ni, ntsa lam hkrum hkat ai shaloi, Dingdung Daw Daphpawm hte February 13 hte 20 lapran hkrum hkat lu na KIO jahkrup ai hpe, asuya dat kasa ni hkap la ai re.

Raitimung Dingdung Daw Daphpawm maga nhtoi sit nna February 25 hta hkrum na bai jahkrup wa ai hpe NRPC kaw na dai ni bat Masum Ya du hkra, hpa shiga n shana wa ai nga, Myitkyina daju simsa lam akyu galaw hpung (Peace-talk Creation Group) na Slg. Lamai Gum Ja, ndai zawn Jinghpaw Shiga Dap de tsun ai re.

“KIO maga na hpung 4 hte 25 ya shani hkrum na matu tsun da ai. Shanhte (NRPC) maga na shana wa na nga ya du hkra gaw hpa n tsun wa shi ai. Dai majaw ya jahkrup nga dingyang naw re.”

Ya byin nga ai Rahkai mung majan gaw KIO, Dingdung Daw Daphpawm hte asuya lapran simsa lam bawngban jahkrup ai lam hpe, madung dingbai dingna jaw ai re nga, Jinghpaw Mungdan Demokresi Pati (KSDP) ningbaw Dr. Manam Tu Ja tsun dinglun ai re.

Dingdung Daw Daphpawm wuhpung mali--- Balawng (PSLF/TNLA), Rahkai (ULA/AA), Kokang (MNTJP/MNDAA), hte Jinghpaw (KIO/KIA)--- gaw “Rahkai mung kaw Dingdung Daw Daphpawm malawm ULA/AA hpe Tatamadaw a majan baw htu gasat ai lam alawan jahkring kau ya rit” ngu nna December 27 ndau hte, lajin dat sai re.