Sharen da hkrum ai Srn. Nang Pu hpe EU a ‘Schuman Awards’ jaw shagrau

EU Schuman Awards hpe Nang Pu a malai nta masha Jan. Nang Bawk sa hkap la nga yang, Feb. 14, 2019

Htawng rawng hkrum nga ai Htoi Gender a ningbaw Srn. Nbau Nang Pu hpe Uropa Dan EU a shinggyim ahkaw ahkang hte seng ai 2019 Schuman Awards kumhpa hpe February 14 bat Mali Ya shana de shagrau sai re.

Masat kumhpa hpe shi a gawng malai nta masha rai nga ai Jan. Nang Bawk sa du hkap la lu sai lam chye lu ai.

“Hpyen yen ni hte myu shayi ni a ntsa myit lawm hkum lawm shakut ai wa re hpe mu mada ai majaw ndai kumhpa lu hkra madung shakut madi shadaw ya ai lam re,” nga nna kumhpa lu hkra mying bang madi shadaw ya ai Kachin Women Peace Network (KWPN) na Jan. Lashi Labya Hkawn Htoi (snr) May Sabe Phyu, Jinghpaw Shiga Dap KNG de sanglang dan ai re.

Ndai EU shagrau kumhpa a matu shawk da ai masha jahpan yawng 13 nga ai kaw, me jaw ladat hte marai masum hpe bai lata ai shaloi, Srn. Nang Pu gaw me shadang law dik re lam, Jan. Hkawn Htoi tsun ai re.

Democracy lam, tara upadi ka-up kahpwi lam, simsa lam hte shinggyim ahkaw ahkang lam ni hta n hkrit n tsang shakut shaja ai ni hpe kumhpa masat shagrau ai lam re nga, EU lithkam ni tsun ai re.

“Wunpawng mungdan hta wunpawng myu shayi langai ndai zawn kumhpa lu ai gaw anhte mungdan hta rawt jat ai ninggam langai ngu na kabu lawm ai re,” nga nna Jinghpaw pati pawng hpawng hpung malawm, Kachin Democratic Party ningbaw Slg. Gumgrawng Awng Hkam tsun ai.

2018 Dec. 7 ya hta Shd. Hkangkum Lum Zawng hte Slg. Hkawn Zau Jat yan hte rau htawng jahkrat hkrum nna ya na zawn shagrau hkrum wa sai re.

Kachin Youth Movement na tara kasa Nhkum Seng Hkum Awng hku nna mung ndai zawn tsun ai re.

“Ndai kumhpa lu ai majaw htawng na pru wa ai hpang e mung grau na n-gun atsam hpring ai hte galaw lu na re hpe kam ai.”