Myitsone masing n hkapla ai lam Norway dat kasa hpe asan tsun

Feb. 8, 2019 Norway dat kasa Lise Norgaard hte Jinghpaw pati pawnghpawm hpung ningbaw ni Myitkyina Palm Spring Hotel ka hkrum.

Myitsone hka madim masing hpe ‘n hkapla ai lam’ Myen mung hte seng ai Norway Sumtsan Salang Rung dat kasa hpe Myitkyina e Feb. 8 bat Manga Ya shani hkrum ai shaloi, Jinghpaw Pati Pawnghpawm Hpung asan tsun dat masai re.

Slg. Lise Nordgaard (Minister of Counsellor) kaw nna Mali-N’mai Zup hka madim masing hte seng nna ningmu san ai shaloi ‘n hkapla lu ai lam’ hpe shi asan sha tsun dan sai lam, pati pawnghpawm hpung malawm, Kachin Democratic Party (KDP) Ningbaw, Slg. Gumgrawng Awng Hkam tsun ai.

Bai nna, Jinghpaw mungdaw rawt jat galu kaba lam hta myihprap wan hte sut hpaga masing kaba ni ra ai hpe hkap la ai raitim, jet ai federal lu ai hpang she galaw mai na re ai hte, hpa majaw law nga yang, ya ten democracy ngu tim ginjaw jum tek masa naw re majaw, mungdaw kata bawngring masing kaba galaw na hpe n hkapla lu ai re lam, Norway sumtsan salang hpe tsun sanglang dan sai lam shi tsun ai.

Aten 1pm kaw na 3pm jan du hkra, hkying hkum 2 jan Palm Spring Hotel hkrum shaga hpawng kaw Norway a simsa lam garum madi shadaw ai hpe chyeju dum ai lam, matut nna dingyang garum madi shadaw na matu Jinghpaw Pati Pawnghpawm Hpung ningbaw ni lajin dat sai lam chye lu ai.

Myen mung simsa lam a matu, Joint Peace Fund (JPF) kaw ja gumhpraw jaw bang ai maigan mungdan 11 kaw Norway lawm ai re. Ngam ai ni gaw Australia, Canada, Denmark, European Union, Finland, Italy, Japan, Switzerland, the United Kingdom hte the United States, ni rai ma ai.