KDI a Learning Center Myitkyina hpe hpaw dat

Learning Center Myitkyina hpaw ai akyu hpyi lamang, Du Mare, Feb. 5, 2019

Kachin Democratic Institute (KDI) a Myitkyina Learning Center hpaw ai akyu hpyi lamang hpe daini February praw 5 Rawt Malan Nhtoi e galaw lu sai.

4 ning hpring KDI chyeju shakawn hte rau Du Mare, ya Kachin Democratic Party (KDP) rung wang kata Learning Center (ginra) hpaw ai lamang galaw ai re.

Ndai Myitkyina Learning Center hpaw ai yaw shada lam hte seng nna KDI Hpa-awn Dr. Gumgrawng Hkan Naw ndai zawn Jinghpaw Shiga Dap KNG de tsun ai.

“Kachin society ngu ga le i..anhte wuhpung wuhpawng kata kaw..daini anhte myit ningma ni anhte a hkrat sum ai ahkaw ahkang ni..e ndai lam ma hkra hpe jawm jahta jawm mahtai tam rai nna, tengman rap ra ai wuhpung wuhpawng hpe jawm gawgap ga ngu ai..dai gaw madung rai nga ai. Dai majaw ahkyak dik gaw anhte jawm mahtai tam lu ai rapdaw wuhpung wuhpawng platform ngu ga le i..jawm gawgap sa wa ga ngu ai dai gaw ahkyak rai na re.”

KDI-Learning-Center-Myitkyina.jpg
Dr. Gumgrawng Hkan Naw, Myitkyina Learning Center, Du Mare

Shawng n’nan Myitkyina Learning Center galaw madung dat galaw sa wa na lam hpe Dr. Hkan Naw matut tsun ai re.

"Anhte byin mayu ai ramma shawnglam, amyusha shawnglam hpe jawm myit yu lu na matu nambat 1 gaw anhte ramma ni hpe youth empowerment program i..ramma ni hpe grau nna shangang shakang ai n-gun jaw ai..e dai hpe shawng n'nan jawm galaw wa ga ngu ai hku rai nga ai. Ndai gaw ramma ni na matu ahkaw ahkang gaw kaja wa myit lawm ai, hpaga myit lawm ai, mungmasa myit lawm ai, hpaji myit lawm ai jawm gahkyin gumdin let rai nna magam bungli jawm gawgap sa wa ga ngu ai."

Jahpawt hkying 8 kaw na hkying hkum mi jan galaw ai Myitkyina Learning Center hpaw ai lamang de saw shaga tawn ai Myitkyina nawku hpung shagu de na hpung woi ni, pati du salang ni hte mungshawa wuhpung wuhpawng ningbaw ni sa du shanglawm sai re.

KDI hpe KDP npu alak mi lakying langai hku nna 2015 hta hpaw hpang ai re.

Maning 2018 hta, KDI gaw Jinghpaw Mungdaw federal gawda ai tara nhprang laika buk (Kachin State Federal Constitution draft) hpe dip shabra lu nna Jinghpaw Mungdaw Federal Gawda Ai Tara nhprang ka momiti (Kachin State Federal Constitution drafting committee) hpe mung hpaw lu sai re.

Bai nna, lai wa sai 2016 ning kaw nna federal hte seng ai machye machyang myi jahpaw wunkat ni hpe mung Jinghpaw mungdaw kata galaw nga ai re.