Myen-KIO Hkwi Ming zuphpawng mahtai, masa kaja

Du Daju Jum Nban La, KIO Ginjaw Komiti Tingnyang Up

Mani, Miwa mung Hkwi Ming e galaw ai, Myen asuya hte Wunpawng Mungdan Shanglawt Hpung KIO yan, simsa lam hte seng ai ntsa lam hkrum shaga ai zuphpawng, mahtai kaja ai hpe chye lu ai.

KIO shiga lawk hku nga yang, wuhpung lahkawng lapran tara shang bawngban ai lamang hpe du na February shata hta galaw na myit hkrum dawdan da sai lam, tsun ai.

KIO Ginjaw Komiti gaw, maning 2018 kaw nna tatmadaw hpyendap hte san san gap hkat jahkring ga sadi (bilateral ceasefire agreement) galaw na tang madun bawngban shakut wa ai kaw, ya dai hpe asuya hkapla wa ai masa mai byin ai nga, dai zuphpawng yu maram ai ni dinglik ai re.

Dai shiga lama teng yang, Myen asuya hte hpyendap maga shayawm wa ai masa rai na re.

Shawng de na zuphpawng shagu hta gaw, KIO hpe mungdan ting gap hkat jahkring NCA ga sadi hpe hkap la na matu sha Myen asuya hte hpyendap, lahkawng maga dip n-gun jaw wa sai re.

Myitkyina Simsa Lam Akyu Galaw Hpung, PCG hte Miwa asuya a lapran tsap garum ya ai npu, Myen hte KIO, dat kasa manga hpra gaw, Yunnan mungdaw mare daju Hkwi Ming (Kunming) e bat Langai Ya shani, hkrum shaga ai re.

Zuphpawng de Myen asuya hte hpyendap maga ahkyak ai salang ni shanglawm ai re. Asuya National Peace and Reconciliation Center, NRPC Ningtau Ningbaw Slg. Ting Zaw dat kasa hpung woi awn nna, amu madu hpyendu usa Lt-Gen Hkin Zaw Oo, hte December 21 ya shani tatmadaw kaw na hpaw ningnan ai, ‘gap hkat jahkring hte htani htana simsa lam’ jahkrup jahkrum komiti a Ningbaw, Lt-Gen Ya Pyi, mung lawm ai re.

KIO dat kasa hpung hpe gaw Ningbaw Malai Dukaba Sumlut Gun Maw woi awn ai re.

Ndai zuphpawng n du shi yang, January 14 ya nhtoi hte Chiangmai Jinghpaw Wunpawng Mungchying Mungshawa Rapdaw Zuphpawng kaw na ‘Jinghpaw Wunpawng Mungdan gaw de na Awmdawm Shanglawt bandung’ ndau ai lam ntsa, January 17 ya shani KIO a ningmu san ai lam hpe Myen asuya kaw na galaw wa ai lam, KIO Laiza shiga lawk tsun ai.

Maigan daju Jinghpaw Wunpawng Amyusha Hpung KNO woi galaw ai Mungshawa Rapdaw Zuphpawng kaw na Awmdawm Shanglawt bandung ndau ai raitim, ya ten, kanu mungdan kata ngai KIO hte mungmasa pati ni gaw jet ai federal mungmasa bandung a matu woi shakut nga ai re.