Amyusha mying n hkrum n ra lam ntsa KIO Laiza kaw zuphpawng galaw

Laiza manau wang
Amyusha mying hpe ‘Jinghpaw’ ngu lang hkrat wa ai kaw na, ‘Wunpawng’, ‘Kachin’ ngu bai lang ai lam ni nga wa ai majaw n hkrum n ra lam ni byin wa ai hpe bawngban jahkrum la lu na matu Wunpawng Mungdan Shanglawt Hpung KIO gaw, Laiza kaw alak mi zuphpawng shaga galaw ai re.

Amyusha mying hpe ‘Jinghpaw’ ngu lang hkrat wa ai kaw na, ‘Wunpawng’, ‘Kachin’ ngu bai lang ai lam ni nga wa ai majaw n hkrum n ra lam ni byin wa ai hpe bawngban jahkrum la lu na matu Wunpawng Mungdan Shanglawt Hpung KIO gaw, Laiza kaw alak mi zuphpawng shaga galaw ai re.

Jinghpaw Wunpawng amyusha bawsang kru snr sanit kaw na bawsang shagu hta dat kasa masum hpra hpe shaga nhtawm, “Htunghking hte Shawnglam Mungmasa Bawngban Hpawng” gabaw npu masum ya bawngban ai lam hpe Laiza e January 16 kaw nna 18 du hkra galaw ai re.

Zuphpawng kaw ‘amyusha mying hte bawsang’ hte seng nna, bawsang shagu a hpaw malang dan ai ningmu ni hpe hkap madat shinggyin la ai lam ni galaw ai rai nga ai.

KIO kaw na mung, shawng e ‘Jinghpaw’ Mungdan Shanglawt Hpung kaw na ‘Wunpawng’ ngu gasi hpe lai wa sai 1969 ning kaw na galaw lang hkrat wa ai re. Hpa majaw dai zawn galai lang ai lam hpe KIO kaw na sanglang dan ai lam chye lu ai.

Bai, amyu lakung masat ai lam kaw mung n hkrum n ra byin nga ai re. KIO gaw ‘Wunpawng’ ngu ai hta bawsang sanit—Jinghpaw, Maru, Lashi, Ahzi, Lisu, Nung, Rawang ngu masat ai. Raitim, Myitkyina, Wunpawng Htunghking Hpung Ginjaw gaw bawsang kru—Jinghpaw, Maru, Lashi, Ahzi, Lisu, Rawang ngu masat ai re.

Ndai zawn amyu bawsang masat ai shai hkat ai lam hta mung ningmu tang madun bawngban ai lam ni galaw wa sai lam chye lu ai.

Laiza zuphpawng e tang madun bawngban wa sai ‘Amyusha mying hte Amyu bawsang masat ai gabaw ni’ hpe htawm de matut bawngban sa wa na re lam chye lu ai.

January 10, 71 ning hpring Jinghpaw Mungdaw Nhtoi, asuya woi galaw ai Myitkyina Manau Poi hta nambat langai lang, ‘Kachin’ Mungdaw Nhtoi ngu Wunpawng Htunghking Hpung Ginjaw kaw na lang wa ai re. Raitim, dai gasi shakap ai Manau Poi ndau, N’Jang Hka mahkrai lam numshang gaw January praw 5 ya shani wan nat hkrum nna, maga mi de ninghkap ai masha ni law wa ai majaw, jahtum e mying hpe moi na zawn ‘Jinghpaw’ ngu bai galai lang ra wa sai re.