Myen-KIO, Miwa mung Hkwi Ming e hkrum shaga

January 21, 2019 Myen-KIO dat kasa ni Miwa mung Kunming e hkrum

Myen asuya simsa lam komishin hte Wunpawng Mungdan Shanglawt Hpung KIO ginjaw dat kasa ni gaw, January 21 daini Miwa mung Yunnan mungdaw Hkwi Ming e hkrum shaga nga sai re.

Miwa lapran tsap garum ya ai npu, Myen asuya NRPC (National Reconciliation and Peace Center) Ningtau Ningbaw Slg. Ting Zaw woi awn ai hpung hte KIO Du Kaba Sumlut Gun Maw woi ai hpung lapran, simsa lam hte seng nna ntsa lam (informal talk) hku hkrum shaga ai lam re.

Ndai zuphpawng hta NRPC maga tatmadaw hpyendap de na gawng malai lahkawng--- hpyendu usa Lt-Gen Hkin Zaw U hte December 21 ya shani ningnan hpaw ai hpyendap a Gap Hkat Jahkring hte Htani Htana Simsa Lam Bawngban Hpung a ningbaw Lt-Gen Ya Pyi yan lawm ai re.

Dai re majaw, Jinghpaw mungdaw kata gap hkat jahkring lu na matu ahkyak ai zuphpawng rai na hpe shi myit mada ai nga, Myitkyina, Jinghpaw Mungdaw Democracy Pati KSDP Ningbaw hte KIO Tingnyang Up Malai-2 hkringsa, Dr. Manam Tu Ja ya na zawn tsun ai.

“Gap hkat jahkring ai lam hpe madung bawngban wa na hta e KIO maga hku nna gaw ndai bilateral hpe e grau n-gun dat mayu na re. Mungdaw kata e gap hkat shazim ai lam hpe..grau n-gun dat mayu na. Asuya maga gaw NCA hpe tsun wa rai na re. E..ndai lahkawng hpe gara hku jahkrup la lu na i ngu ai dai ahkyak ai hku rai nga ai. Shanhte bawngban ai hta hkan nna bilateral mung mai byin wa ai. E..re gaw bilateral byin na gaw grau mai byin ai ngu nna ngai gaw kam ai hku re law.”

December 21 Tatmada Makawp Maga Dap Daju Rung a ndau hta shata 4 majan jahkring ai lam (December 21, 2018 kaw nna April 30, 2019) hte ndai ladaw laman gap hkat jahkring ai lam hte htani htana simsa lam hte seng nna, mungdan ting gap jahkring NCA ga sadi sen htu ai, n htu ai amyusha laknak hpai hpung shagu hte, tatmadaw dat kasa ni bawngban sa wa na re nga ndau tawn ai re.

Ndai ndau hpe hkalum ai lam, December 22 ya shani KIO bai htang ndau ai kaw hpyendap lit nga ningbaw ni hte KIO dat kasa ni kata lam san san hkrum shaga mahtai tam mayu ai lam, lajin tawn ai re.

Raitim n hkapla ai lam chye lu ai. Hpa majaw nga yang, December 22 KIO ndau hta mungdan ting madang hpyendap a htu gasat majan jahkring ya na shadut ai lam hte, December 27 ya shani KIO shanglawm ai Dingdung Daw Daphpawm (Northern Alliance) a ndau kaw mung ya jang byin nga ai Rahkai mungdaw AA (Rahkai Hpyendap) ni hpe htu gasat ai lam jahkring kau ya na hpyi ai majaw re nga, Myitkyina Simsa Lam Akyu Galaw Hpung PCG hpe lakap let chye lu ai re.

Ya, Hkwi Ming zuphpawng n du shi yang, KIO Dukaba Sumlut Gun Maw a facebook hta ‘Myen hpyendap gaw KIO hpe jahten sharun hpung ngu tsun ai, NRPC gaw gara hku masat na n chye ai. Hkrum jang san na matu matsing da ai’ nga nna January 17 ya shani ka tawn ai re.

Bai, NRPC amu madu hpyendu usa Lt-Gen Hkin Zaw U a facebook hta gaw ‘(awmdawm shanglawt bandung gaw de na) Chiangmai Jinghpaw Wunpawng Mungshawa rapdaw zuphpawng ndau hpe lawu na hte maren mu lu ai. De ntsa KIO gara hku mu ai kun n chye ai’ nga nna January 17 ya shani ka tawn ai re.

Maning 2018 ning Dukaba Nban La, KIO Ginjaw Komiti Tingnyang Up shara galai la wa ai kaw nna, NCA n re sha, Myen hpyendap hte mahtang bilateral ceasefire agreement (hpyendap shada da gap hkat jahkring ga sadi) sen htu lu hkra galaw shakut wa ai gaw, ya ten du hkra re.