Israela a shawng na Shata mung Hpungtang Li gap shalun na Cape Canaveral de shayawn

SpaceIL hte IAI a Shata mung yu hkrat na hpungtang li, Beresheet. Sumla: Thomas Coex (APP)

Israela galaw ai shawng na Shata mung kaw yu hkrat na, namnak kilogram 180 nga ai Hpungtang Li hpe gap shalun shara Amerikan Florida mungdaw Cape Canaveral de htaw sa na matu jak rai ahtu agawng n nga, n hten hkra katsi kahtet jahtuk sharam ya ai alak mi sadek kaw bang tawn sai re.

Nbungli hte Israela kaw na Orlando Mungdan Gadaga Nbungli Daru de du yu ai ten, Bereshit snr Beresheet (Hebre ga lachyum Shawng Ningpawt) ngu shamying ai hpungtang li hpe mawdaw hte bai Cape Canaveral Nbung Dap Dabang de htaw sa na re.

Hpungtang Li hpe SpaceX Falcon 9 rocket hte, kaga SSL company galaw ai matut mahkai jak shagan langai hte arau sha, gap shalun na rai nga ai.

“Matsat ning bungli shakut shaja ai hpang anhte a shingran hkrang shapraw lu sai: Jahtum e anhte Hpungtang Li lu sai”, nga SpaceIL Hpa’awn Slg. Ido Anteby tsun ai.

Bereshit hpungtang li hpe February shata n gap shalun shi yang SpaceIL hte IAI (Israel Aerospace Industries) engineer ni kaw na hpang jahtum jep chyam ai lam shawng galaw na re.

Dai hpang, hpyen da ai Shata mung du yu na masing awngdang ai shaloi, Israela labau hta shawng n’nan hte, dinghkrai ja gumhpraw garum ai hte Israela gaw, Shata mung hta hpungtang li du yu ga sai n-gun kaba mungdan masum-- Miwa, Rasha hte US kaw jahpan shang wa sana re.