Mungdan Shanglawt Nhtoi e rim hkrum ai ramma ningbaw 3 hpe dat ya na hpyi

Jan 4, 71 ning hpring Myen mung shanglawt nhtoi e Myitkyina Manau Wang e Ramma ni ndai zawn rim hkrum ai ningbaw 3 hpe dat ya na matu 'FREE 3' laika si hkrang shala let hpyi lajin dat sai re.

Daini, January praw 4 hta ang ai (71) ning hpring Myen Mungdan Shanglawt Nhtoi e, rim hkrum ai hpyen yen mungshawa lawt lam ramma n-gun madun poi ningbaw masum, lawt pru wa na matu, T-Shirt palawng dut garan ai lamang hpe Myitkyine galaw wa ai.

Dai hpawt daw kaw nna, Manau Wang kata ramma ni ‘FREE 3’ laika si hkrang shala hte, n tara rim hkrum ai Shd. Hkangkum Lum Zawng, Slg. Hkawn Zau Jat hte Saranum Nang Pu ni hpe dat ya na matu, ramma ni T-Shirt palawng dut garan ai ladat hte tengman lam a matu shamu shamawt lamang galaw ai rai nga ai.

Rim hkrum ai masum lawt pru na matu hte tara rap ra ai tara jeyang hkrang hpe ra sharawng ai majaw ndai zawn ramma ni T-Shirt hte Sticker shamu shamawt lam hpe galaw ai re nga, lamang woi awn ai Shy. Sut Seng Htoi kaw na Jinghpaw Shiga Dap, KNG hpe tsun sanglang dan ai.

Palawng lu dut ai gumhpraw hpe gaw hpyen yen dabang hte sharen da hkrum ai ramma ningbaw masum a dinghku ni hpe garum jaw na yaw shada ai nga, shi matut tsun ai.

Maning 2018 laman, tatmadaw Myen hpyendap hte Wunpawng Mungdan Shanglawt Hpyendap KIA lapran Jinghpaw mungdaw kata byin ai majan ginra hta Myen hpyendap kaw na pat hkum da ai hpyen yen mungshawa ni lawt pru wa lu hkra, Myitkyina e ramma n-gun poi hpe April 30 kaw na May praw 8 du hkra galaw ai re.


Dai n-gun madun poi woi awn ai, Shd. Lum Zawng, Slg. Zau Jat hte Srn. Nang Pu ni hpe Myen asuya upadi tara kanu masat 500 hte maren, tatmadaw hpe sari jahpyak ya ai ngu, Myen Hpyendap Dingdung Daw Daju (M.P.Hk), Dukaba Myu Min U kaw na tara jawat tawn ai re.

Myitkyina myo-ne tara rung gaw, ndai manghkang hpe shata 7 jan san jep nhtawm, December praw 7 ya shani ramma ningbaw masum hpe htawng shata 6 hte gumhpraw dam kyat sen 5 hpra, tara masa hku tsaw dik ari jaw jeyang ai re.

Ndai zawn tara jeyang ai sat lawat gaw tsepkawp tara rap ra ai lam n nga ai majaw mungdan kata shinggan ramma hte shinggyim ahkaw ahkang wuhpung ni sha n ga, mungdan gadaga shinggyim ahkaw ahkang wuhpung ni du hkra, laja lana tsun dinglun ai lam galaw nga ai re.

Maga mi de, Jan. Awng San Su Chyi a NLD asuya woi awn ai Jinghpaw mungdaw asuya ntsa e mung mungshawa kam ai shadang grau she hkrat yawm nga sai re.