KIA Dapba 10 ni, Myen asuya dap hpe bawm kaba 2 hte hkap dem gasat

Lahta Sammung Pangsai (Kyukok) ginra KIA Dapba 6 hpyen hpung

Daini bat Kru Ya jahpawt daw hkying 10 jan ten, Lahta Sammung KIA Dapba 10 ni, Tamungne-Mungji lam Man Pying de lung wa ai Myen asuya dap hpe bawm kaba lahkawng hte hkap kapaw nna aten kadun gap hkat wa sai lam, KIA shiga lawk tsun ai.

Tamunge hte Mungji lapran, Pyin Long kaw na Man Pying de lung wa ai Myen dapnu (tat-ma) 99 ngu maram lu ai hpyen hpung hpe, tinang KIA Dapdung 2 ni Hkanggaw-di remote bawm kaba lahkawng hte hkap dem kapaw ai hpang aten minit 15 dang gap hkat ai lam, Lahta Sammung KIA shiga lawk tsun ai.

Ndai zawn bawm hte hkap gasat ai majaw, asuya dap maga si hkala lam nga nna dai shara kaw sha daina maga ten du hkra hpyen hpung hkring nga ai lam, Lahta Sammung KIA shiga lawk matut tsun ai.

Kutkai-Tamungne-Mungji lam dingyang hta Myen asuya dap ni shimlam la da ai re.