Nhkum Jan Ma Lawk hpe gap ai RCSS Sam dap re

Asak 60, Nhkum jan Ma Lawk gaw Nov. 17, 2018 shana de yi kaw na wa ai kaw, Lashu, Man Pying makau kaw gap sat hkrum ai re. Sammung dingda RCSS ni gap ai re lam tsun ai.

Lai wa sai bat, Lahta Sammung Lashu grupyin yi kaw na nhtang wa ai lam kaw asak 60 ning Nhkum jan Ma Lawk hpe gap sat ai gaw, Sammung dingda Sam dap RCSS/ SSA ni re lam, ginra masha ni tsun ai.

Lashu-Namtu lam ntsa Man Pying mare makau, RCSS hte Balawng dap TNLA, Sammung dingdung Sam dap SSPP/SSA pawnghpawm dap lapran, November 17 ya shana de gasat gala majan byin ai re.

Dai ten, gap sat hkrum ai Jan. Ma Lawk hte yi na wa ai gumgai ni gaw, majan byin ai shara kata n re ai laga shara kaw nga nga ten, ‘shanhte gaw yi na wa ai mungmasha ni hkrai re lam, shanhte kaw hpyenla ni n nga ai lam hpe Sam ga hku mung, Myen ga hku mung’ lang hte lang marawn tsun wa sai lam’ chye lu ai.

Dai zawn marawn tsun nga ten, RCSS dap ni dasang sinat gap abraw bun ai kaw Lashu Sinna Buga Hkalup Hpung, Man Pying mare na Nhkum jan. Ma Lawk hpe sinat pala hkra ai re lam, mare masha ni tsun ai re.

“Ndai gaw Dingda daw Sam dap (RCSS) gap sat ai re lam tsun ai. Dingda daw dap ni gaw Lahta Sammung e nga ai Jinghpaw mare masha ni hpe mung lang hte lang laga rawt malan hpung ni hpe n ra ai lam lang hte lang grai sadi jaw tsun yu sai re. Ya gaw yi galaw ai mungmasha ni hpe dingbai dingna jaw hpang wa sai. Ndai gaw masing hte galaw ai re. Dingda daw hpung gaw Myen hte pawng nna manghkang n byin byin hkra galaw nga ai hpe mu ai” nga nna buga salang langai dinglik tsun wa ai.

Matut nna ndai sat lawat gaw, Jinghpaw amyusha ni law ai Lashu grupyin hta Jinghpaw ni hpe jasan kau na masing hte galaw ai rai na re hpe lahta na salang wa mu mada ai re.

Asak 60, Nhkum jan Ma Lawk gaw Nov. 17, 2018 shana de yi kaw na wa ai kaw, Lashu, Man Pying makau kaw gap sat hkrum ai re. Sammung dingda RCSS ni gap ai re lam tsun ai.

“Shanhte RCSS gaw Lahta Sammung kaw KIA Shanglawt Hpyendap nga ai hpe n ra ai. Ya manghkang byin ai ginra hta Jinghpaw ni law law nga ai. Dai re majaw dai ginra na Jinghpaw ni hpe laga shara de htawt shachyut kau na masing hte galaw ai rai nga re ngu mu ai.”

2015 October shata, Myen asuya hte mungdan ting gap hkat jahkring NCA ga sadi sen htu ai hpang, Sammung dingda daw daju ai Sam dap RCSS ni gaw n-gun kaba hte Lahta Sammung de yan lung wa sai re. Dai hpang, Balawng Dap TNLA hte Sammung Dingdung Dap SSPP ni hte gasat gala majan ni byin wa ai re.

Lahta Sammung e RCSS/ SSA (Restoration Council of Shan State/ Shan State Army) dap ni shamu shamawt nga ai hpang kaw, Myen asuya dap ni galoi mung hkan nang nga ai hpe ginra masha tsun nga ai re.