KIA Dung 22 Kawng Ja post hpe Myen asuya dap ni zing

Putau lam KIA post langai

Myitkyina-Putau lam, KIA Dapba (1) npu Dung 22 a Kawng Ja post kaji hpe Myen asuya dap ni, lai wa sai lahkawng ya hta zing madu sai re.

Asuya dap ni n-gun kaba hte maja lung wa ai majaw, tinang masha n-gun n law ai Kawng Ja post hpe Nov.13 Bat Lahkawng Ya shani yen ya ai lam, KIA shiga lawk tsun ai.

Ndai shawnglam dap kaji gaw Mali Hka a sinna hkran kaw nga nna, KIA Dapba 2 ginra hte jarit ai, hpyen masa ahkyak ai shara mung re lam chye lu ai.

Ya kalang bai, KIA Dapba (1) Mali Hka a sinna hkran maga de Myen hpyen hpung ni shamu shamawt wa ai majaw, majan laja wa na masa nga ai lam, Laiza na KIA salang ni tsun ai re.