Namhui kaw gap hkrum ai KIA hte mungmasha ni tsirung du

KIA Dapba 6 hpyen hpung, Munggu

Mani, Lahta Sammung Namhui kaw shat shadu sha nga ten Myen asuya dap a maja sa gap hkrum nna hkala hkrum mat ai KIA hpyenla 2 hte nta madu jan, daini tsirung du nga sai lam chye lu ai.

Hkala hkrum ai hpyenla 2 gaw KIA Dapba 6 na rai nna dai hpawt daw Mai Ja Yang tsirung de du wa sai lam, Mai Ja Yang tsirung shiga lawk tsun ai.

Bai nna, hkala hkrum ai Namhui mare masha, nta madun jan gaw Lashu tsirung kaw du nga ai lam matut chye lu ai.

KIA Dapdung 9 ginra Tamungne mare a sinna Namhui mare, mare salang wa a dum nta shat gawk kaw KIA hpyenla ni shimlam n la ai sha shat shadu sha nga ten, aten 12pm jan kaw Myen hpyenla ni a maja sa gap hkrum nna hkala hkrum ai lam re.

Mani, October 31 hta, simsa lam hte seng nna, NCA simsa lam sen n htu ai Dingdung Daw Daphpawm na wuhpung masum--- Rahkai Dap AA, Balawng Dap TNLA hte Kokang Dap MNDAA ni gaw Myen asuya simsa lam komishin hte, Miwa mung Hkwi Ming (Kunming) e hkrum shaga ai kaw, KIO Ginjaw Komiti Tingnyang Up Dukaba Nban La mung sakse hku na sa lawm nga ten, ndai zawn KIA ni gap hkrum ai re.