Num kasha lahkawng hpe roi rip, ma manga kanu hpe woi hprawng ai la hpe lu rim

Slg. Kyaik Sai (hkra) hte shi woi hprawng ai, Manje na ma manga a kanu

Manmaw ginwang Manje e num kasha lahkawng hpe roi rip jahten da nna, ya ma manga a kanu hpe matut masu woi hprawng ai la langai hpe ahkyak la rim ya na matu garum hpyi ai majaw Pat Jasan Hpung ni garum ya sai re.

Namti, Lambraw Yang PJS hku nna, Manje (Mansi) mare masha Slg. Kyaik Sai, asak (53) hpe shi woi hprawng ai num hte rau, Wanleng lam Mayan Pang Hka, hka hku tingnyin sun dabang kaw na August 26 hta sa tam lu rim la ai rai nga ai.

Dai la wa hpe PJS rung e san jep yu ai shaloi, “ma manga a kanu hpe woi hprawng ai wa Slg. Kyaik Sai gaw lai sai ten hta Manje (Mansi) kaw Jinghpaw num kasha lahkawng hpe jahten roi rip da ai hpe chye lu ai lam”, shi hpe san jep ai PJS malawm Slg. Thomas Nhkang, Jinghpaw Shiga Dap KNG de tsun ai.

Kawng-Ra-village-in-Mansi.jpg

Madu wa naw nga ai ma kanu hpe woi hprawng ai Slg. Kyaik Sai hpe, dai num a nga shara Manje (Mansi), Kawng Ra lawk de woi mat wa nhtawm seng ang ai mare salang wa a lata de August 27 ya shani wa ap sai lam, PJS ni tsun ai.

N tara masha wa a madu jan gashun ai Slg. Kyaik Sai hpe ahkyak la ya na matu seng ang ai asuya balik ni hpe shiga shana ai raitim hpa n galaw ai majaw, shinggyim nauna masa hte Lambraw Yang PJS hpung garum ai re lam chye lu ai.