Labau shang, Jinghpaw pati ni ‘Kachin State Party’ hta chyawm

August 11, 2018 KNC, KSDP, UDPKS hte KDP ningbaw ni Amyusha Dawnghkawn (pai) hte KSP Dawnghkawn (hkra) hte labau shang sumla gayet nga yang.

Jinghpaw Mungdaw masha ni mu mayu ai, Jinghpaw pati pawng gahkyin ai lam hpe aten galu jahkrup wa sai hpang, 'Jinghpaw Mungdaw Pati (KSP)' n’nan a mying hte de a dawnghkawn, dazik ni hpe dai ni August 11 ya shani labau shang myit hkrum shagrin lu sai re.

Kachin Democratic Party KDP, Kachin State Democracy Party KSDP, Kachin National Congress KNC hte Unity and Democracy Party of Kachin State UDPKS pati mali hpe dawm kau nhtawm Kachin State Party kata yawng langai sha hte mungdaw a matu mungmasa bungli galaw sa wa na hpe myit hkrum ai lam rai nga ai.

KSP ngu ai pati ningnan a dawnghkawn nsam kumla gaw, ‘ahkyeng ahpraw lamu nsam ntsa Jinghpaw mungdaw sumla atsit hte kap’ hku nna myit hkrum da sai re.

Wunpawng Amyusha Mungbawng Rapdaw WMR a mungshawa dat kasa marai 17 komiti a lam shading woi awn jahkrup ya ai npu, August praw 1 pati mali zuphpawng kaw tinang pati ni hpe tsepkawp dawm kau nhtawm amying shingteng ningnan hte pati kaba hpaw shabawn sa wa na matu myit hkrum sai hte maren, dai ni galaw sa wa ai re.

Ndai zawn, labau shang pati mali pawng gahkyin kau nna Jinghpaw Mungdaw Pati n’nan hpaw wa lu ai hte seng nna mung shawa sanglang dan ai lamang hpe kade n na yang galaw na lam chye lu ai.

Jinghpaw pati ni pawng hpawm lam hpe 2014 kaw nna shakut wa ai raitim, n lu pawng ai sha kadai mung kadai chye ai hku 2015 ra lata poi shang ai kaw tinang mungmasha a madi shadaw me n lu, hkrat sum wa sai re.

Dai mahkrum madup hpe sharin na nna, 2018 January 13 ya shani hta gaw shawng n’nan KDP, KSDP hte KNC pati masum gaw, pawng hpawm na myit hkrum ai lam MOU ga sadi hpe sen htu hpang wa sai re. Dai hpang pawng hpawm pati mying hpe ‘Kachin National Congress Party, KNCP’ ngu na myit hkrum da ai hpe February 20 ya shani, shiga dap ni de sanglang sai re.

Raitim, Jinghpaw pati pawng hpawm lam hte seng nna, WMR woi awn ai hte April 10 ya shani Myitkyina Manau Wang e galaw ai mungshawa zuphpawng kaba hta Manau Shadung pati (UDPKS) bai pati pawng hpawm hpung de shang wa ai re.

WMR a mungshawa dat kasa malawm 17 Komiti a woi awn jahkrup ya ai hte maren, ya dai ni gaw labau shang pati pawng hpawm mying hpe ‘Kachin State Party’ ngu masat hpaw lu ai lam rai nga ai.