Myen gaw ‘ga n garan pru na lam’ hpe KIO hkapla na tsun


Myen gaw KIO hpe gap hkat jahkring n bawngban shi yang ‘ga n garan pru na’ ngu ai hpe shawng hkap la na matu Laban shani Dali zuphpawng kaw asan sha tang madun dat sai re.

Dai gabaw bawngban na KIO maga n hkapla shi ai majaw zuphpawng jahkring nna bai bra mat ai re.

KIO hpe Myen maga tang ai kaw “ga garan n pru na lam, pati hkum democracy lam masa hte du-ta-wun-aye-tung-pa” ni hkapla na lam re hpe na chye lu ai.

Dai zuphpawng kaw KIO hkyen da ai gaw, 1994 hte 2013 hpyendap hte sen htu tawn sai gap hkat jahkring ga sadi ni hpe ningpawt nna majan shayawm mat wa na snr gap hkat jahkring na gabaw bawngban na lam re.

August 5 lahkawng lang na Dali mare zuphpawng de KIO dat kasa hpung hpe ningbaw kaba Dukaba Nban La shi nan woi nna, Myen maga tatmadaw hpyendap dat kasa hpung hpe Dukaba Htun Htun Nawng, woi ai re.

Ndai dat kasa hpung ni sha, shawng na Dali zuphpawng hpe February praw 1 ya shani galaw wa sai re. Dai zuphpawng e mung, KIO tang madun ai hpe Myen n hkapla ai majaw zuphpawng hten mat ai re.

Raitim, July 20 ya shani Htai mung Chiang Mai kaw ningbaw kaba Nban La woi awn ai KIO dat kasa hpung hte Dukaba Khin Zaw U woi ai Myen Mung Simsa Lam Komishin dat kasa hpung lapran hkrum hkat ai hpang, ya na Dali byin wa ai re. KIO shanglawm ai Dingdung Daw Daphpawm (Northern Alliance) gaw Myen asuya hte hpyendap dip n-gun jaw nga ai NCA, mungdan ting gap hkat jahkring ga sadi hpe n hkapla shi ai re.

Matut nna wuhpawng lahkawng zuphpawng ni hta gaw, KIO ningbaw kaba shi nan n lawm sana lam hpe Dali zuphpawng e tsun wa sai hpe Jinghpaw Shiga Dap na chye lu ai.

Ya na zawn gap hkat jahkring bawngban lam masa n kaja ai majaw, Jinghpaw mungdaw kata Myen hpyendap majan bai bawa wa chye ai hpe buga kata hpyen masa yu maram ni tsun nga ma ai re.