Myen hte KIO gap hkat jahkring sa wa na kun?

Dukaba Nban La, KIO Ginjaw Komiti Tingnyang Up

Myen asuya hte Wunpawng Mungdan Shanglawt Hpung KIO, maga lahkawng salang ni gaw, gap hkat jahkring lu na lam hte seng na July 20 ya shani Htai mung Chiang Mai kaw hkrum shaga wa sai re.

Myen asuya simsa lam tam hpung, NRPC amu madu hpyen du hkringsa Dukaba Hkin Zaw U woi awn ai hpung hte KIO ningbaw kaba Dukaba Nban La, lapran jahkrup bawngban ai lam re.

Madung majan shayawm na gabaw hte seng nna, hpyen dap shada da matut bawngban sa wa lu na lam jahkrup la lu sai lam hpe chye lu ai.

Myen-KIO Chiang Mai zuphpawng ntsa Jinghpaw Mungdaw Democracy Pati KSDP Ningbaw Dr. Manam Tu Ja ya na zawn tsun ai re.

“Ya ndai gaw shanhte (Myen, KIO) masing jahkrat nna galaw ai masa gaw pru ai. Ya hte na masum lang ngu na Panglong zuphpawng, dai hpang gaw, gap hkat shazim NCA sen rai n htu ai ni hpe langai hpang langai dai hku na hkrum bawng ban mat wa na, dai gap hkat shazim lam NCA lu htu yang mung htu le i? rai na gap hkat jahkring lam galaw mat wa na matu ladat shaw ai masa langai re ngu mu mada ai.”

July 11-16 Naypyidaw 3-lang na Tsaban 21 Panglong zuphpawng kaw KIO dat kasa hku nna Dukaba Sumlut Gun Maw sa du shanglawm nga ai ten, Dukaba Nban La gaw Chaing Mai kaw du taw nga ai re.

KIO gaw Myen hte gap hkat jahkring na kalang bai shakut wa ai lam ntsa maigan daju Jinghpaw Wunpawng Amyusha Hpung KNO Ningbaw Duwa Bawmwang La Raw a ningmu ndai zawn re.

“Gap hkat n jahkring shi ai shaloi Federal Munghpawng mungdan galaw na hpe lahkawng maga de myit hkrum ai lam nga ra ai.”

Myen hpyendap maga, Federal hpe tsepkawp n hkap la ai nga nna lai wa sai February shata Miwa mung Dali e Myen-KIO zuphpawng hta tsun lai wa sai re.

Dai Dali zuphpawng ngut ai hpang, April shata kaw na June du hkra Myen hpyendap n-gun kaba hte Danai patmaw KIA dapdung 14, Awng Lawt dapba 2 daju, Kasung dap 11 hte N Jang Yang dap 4 ginra ni hpe nbung lam, kawng lam hku na laja lana htu gasat zing madu la ai lam ni galaw wa sai re.

Kaja wa gap hkat jahkring lu na matu gaw, wuhpung lahkawng dap lapran jahkring hkring jahkrup hkat ra na hte, ndai ten Myen hpyendap maga htu gasat ai lam ni jahkring kau na ahkyak ai nga nna Dr. Manam Tu Ja, ya na zawn hpaji jaw ai re.

“Asuya hku nna majan shazim ra ai, bawngban ai lam a ding ding di na e shanglawt hte asuya hpyendap lapran kaw e chye na ai lam nga ra ai, shaloi gaw simsa lam lekmat htu wa na rai nga ai”.