KIO aming hte galaw ai lam hpe ginra masha ni ninghkap n-gun madun

KIO aming hte nga nna hkauna pa hku lam baw kyin wa ai hpe Hpai Kawng mare masha ni ninghkap n-gun madun nga yang, June 21, 2018.

Lahta Sammung Munggu ginra Wanding a tawtap, Hpai Kawng mare hkauna pa hku, KIO aming hte Miwa lauban ni lam galaw kyin bang wa ai majaw, dai hpe mare masha ni ninghkap n-gun madun ai lam galaw masai re.

Mare hku, hkauna pa hku lam waw ai masing hpe jahkring kau ya na matu lai wa sai bat June 21 ya shani hkauna pa de lam htu shang wa ai shara hta Hpai Kawng mare masha ni ninghkap n-gun madun ai rai nga ai.

Ndai mawdaw lam hpe KIO aming hte galaw ai hpe shanhte hpa n chye ai nga nna Munggu ginra KIA Dapba 6 salang langai ndai zawn tsun ai.

“Ya dai kaw anhte Dapba 6 ni n chye ai she Div. (uphkang dap) kaw na kun? kadai Ba-4 ni kun? Dai Miwa lauban ni hpe lamu ga, nlung ni, tat-tu-twi (nhprang nhkun) ni dut ya da ai, nga ai hku rai nga ai.”

Myen hte shanglawt majan ningdaw kalang bai hpang ai, lai wa sai 7 ning daram kaw nna ndai mawdaw lam masing galaw wa ai hpe ginra masha ni ninghkap tawn ai lam chye lu ai.

Ndai zawn hkauna pa hku lam waw ai hpe jahkring kau ya na matu seng ang ai KIO ginjaw madang du hkra tang madun raitim dai zawn sa tang madun ai mare masha ni hpe mahtang jahkrit shama ai lam ni galaw ai hpe ginra masha ni tsun ai.