Lahta Sammung KIA Ba 6, Ba 10 ginra hta gasat poi byin

Lahta Sammung KIA Ba 6, Ba 10 ginra hta gasat poi byin

Dai hpawt daw kaw nna, Wunpawng Mungdan Shanglawt Hpyendap, KIA Dapba 6, Dapba 10 ginra Lahta Sammung shara masum kaw Myen asuya dap hte gasat poi ni byin nga ai re.

Mungbaw, Lasham mare baw kaw Myen hpyendap dapnu (tat-ma) 11 npu Hk.M.Y 219 hte KIA Dapba 6, Dapdung 36 kung-4 lapran, mana de gasat poi byin ai, dai shara hta dai hpawt manap hkying 6 kaw nna, dap lahkawng lapran laknak kaba galai gachyai gap hkat nga ai lam, ginra masha ni tsun ai.

Myen hpyen helicopter langai Mungbaw ntsa pyen gayin hkawm ai raitim gap gasat ai lam n nga ai hpe KIA Dapba 6 shiga lawk tsun ai.

Dai hpawt daw sha Mungbaw, Mai Hpang maga hku Myen hpyen garum ni lung wa ai zawn Mai Hpang pyitusit dap kaw nna mung laknak kaba gap garum nga ai lam, KIA Dapba 6 tsun ai.

Deng 105 Gunrai Ginlen Dabang a sinpraw dingdung Namtau mare hpungkyi jawng lahta kawng kaw nga ai Myen hpyendap hte mung, KIA Dap 36 kung-5 ni pyen 2pm daram kaw na gasat poi byin nga ai lam, Dapba 6 shiga lawk tsun ai.

Bai nna, KIA Dapba (10) ginra Tamungnye mare sinpraw maga Hpagum mare makau kaw KIA Dapdung 2 hte 37 yan jawm nna Myen asuya dap hte, shani kaang 12pm jan hta gasat poi byin ai, minit 30 daram du hkra re lam, KIA Dapba (10) shiga lawk tsun ai.