Myen Hk.M.Y 219 hte KIA Dung 36, gasat poi byin

KIA Dapba 6 hpyenla ni, Munggu ginra, Lahta Sam mung

Myen asuya dap Hk.M.Y 219 hte KIA Dapba 6 npu Dung 36, wuhpung lahkawng dap lapran March 23, daina de Lahta Sam mung Mungbaw maga gasat poi byin wa sai.

Mungbaw, Lasham mare baw kaw Myen hpyendap dapnu (tat-ma) 11 npu Hk.M.Y 219 hpyen hpung hte tinang KIA Dap 36, Kung-4 ni, hkrum katut gasat gala majan byin ai re lam, KIA Dapba 6 shiga lawk tsun shateng ai.

Aten hkying 5:30pm daram kaw nna gasat poi byin hpang wa ai gaw minit 45 daram du hkra re lam, tsun ai. Shana hkying 9pm daram hta Myen ni gaw Mungbaw pyitusit hpyendap kaw nna 82mm laknak kaba 6, 7 lang KIA ni hkap ai shara de gap bun nga ai lam matut chye lu ai. 

Myen dap maga si hkala law ai masa mu lu tim tinang KIA maga hpa n ra ai lam, KIA Dapba 6 shiga lawk tsun ai.

Lai wa sai lahkawng ya kaw nna, ndai Myen hpyen hpung gaw Manping, Mankong grupyin de shamu shamawt nna Manping nawku jawng hte hpungkyi jawng ni hta wa rawng taw nga ai lam chye lu ai.