KNCP, shawa hkapla shagrin ai lamang March 31 hta galaw na

Feb 20, Majoi Gawnku pati masum zuphpawng: KNC ningbaw Dr. Kawn La (hkra). KDP ningbaw Duwa Gumgrawng Awng Hkam hte KSDP ningbaw Dr. Manam Tu Ja (pai)

Jinghpaw pati pawng hpawng nna bai hpaw ai n-gun ja ai pati hpe Kachin National Congress Party, KNCP ngu shamying na myit hkrum da sai raitim tara shang hkapla shagrin ai lam hpe gaw March 31 mungshawa zuphpawng hta galaw sa wa na re.

February 15-16 pati masum, KSDP, KDP hte KNC lahta tsang ningbaw ni a Myitkyina Manau Wang, Majoi Gawknu zuphpawng e, KNCP pati mying, dawnghkawn (Amyusha dawnghkawn ntsa shagan hpraw langai kap) hte rung dazik ni hpe bawngban myit hkrum da ai lam rai nga ai.

Mung shawa yawng hpe gawng malai ai pati langai byin hkra shawa masat shagrin ya ai lamang hpe February 20, daini Wunpawng Amyusha Mungbawng Rapdaw WMR woi galaw na matu pati lit ap da sai raitim, ‘ningmu gahkyin aten naw la ra ai majaw’ ngu March 31 de WMR hku nna bai htawt sit kau ya ai re.

Pawng hpawm pati a mying, dawnghkawn hte rung dazik ni hpe myit hkrum masat da sai raitim, March 31 ya Jinghpaw mungshawa zuphpawng hta bawngban myit hkrum ai hpe mahtang hkap la sa wa na re lam hpe pati ningbaw ni tsun ai.

Bra nga ai Jinghpaw mungmasa pati ni pawng hpawm na matu 2013 ni kaw nna shakut wa ai gaw 2018 January 13 ya shani she pati masum lapran myit hkrum ga sadi MOU ta masat htu wa lu ai re. N lu gahkyin shi ai pati mali naw ngam nga ai re.

Jinghpaw mung nga bawsang yawng hpe hkyawm ai n-gun ja ai pati kaba langai de shanawng sa wa na, madung Metta Development Foundation, bawngring NGO, lithkam usa, Srn. Lahpai Seng Raw woi ai Jinghpaw mungshawa ningpawt wuhpung wuhpawng (Kachin CSO) ni gaw February 19 ya shani WMR rung e zuphpawng langai galaw wa sai re.

Dai zuphpawng du sa shawa ni gaw pati ningnan langai bai hpaw na myit n hkrum ai sha, 5 ning jan aten la shakut gahkyin da sai pati masum hpe mahtang shangang shakang sa wa na matu tsun bawngban wa masai re.