Jinghpaw pati pawng na shakut nga ten, pati bai hpawt jat na shiga pru

Jan. 13, 2018, pati pawng hpawm zuphpawng, Myitkyina YMCA

Jinghpaw mungmasa pati n’nan bai hpaw na masa nga ai majaw pati pawng hpawm na MOU myit hkrum ga sadi sen htu da sai pati masum a lahta tsang ningbaw ni a ra ahkyak zuphpawng hpe Myitkyina kaw Feb. 11, Laban ya shana de galaw ai re.

Feb. 19, du na bat Langai Ya hta Myitkyina kaw Jinghpaw mungshawa ningpawt wuhpung ni (Civil Society Organizations, CSOs) a mungmasa zuphpawng (political workshop) kaba galaw hkyen ai re. Dai zuphpawng kaw pati n’nan hpaw sa wa na masa nga ai lam shiga pru wa ai re.

Slg. Thomas Nwawt Mung Dan, lithkam, Humanity Institute-Myitkyina kaw nna ndai zuphpawng madung woi awn ai re hpe chye lu ai.

Ya na zawn pati n’nan bai hpaw na masa a majaw, pati pawng hpawm na myit hkrum da sai--- Kachin State Democracy Party (KSDP), Kachin Democratic Party (KDP) hte Kachin National Congress (KNC) ningbaw ni a hkyak hkyak zuphpawng hpe KSDP pati ningbaw Dr. Manam Tu Ja a Yuzana dum nta kaw galaw ai re.

Ndai pati masum gaw Jinghpaw amyusha gawng malai pati kaba langai hku tsap na yaw shada let, maga mi de mungshawa maga dip n-gun jaw ai lam majaw mung, pati pawng hpawm na myit hkrum ga sadi MOU hpe January 13 ya shani, Myitkyina YMCA zuphpawng hta sen htu ai madung de du lu ai re.

Pati mying, dazik hte dawnghkawn ni hpe February 20 ya shani Shatapru Manau Wang, Majoi Gawknu e galaw na mungshawa dat kasa zuphpawng kaba hta tara shang bawngban masat shagrin la ai lamang galaw na matu, nhtoi hka tawn sai re.

Raitim, mungshawa zuphpawng lamang woi galaw na Wunpawng Amyusha Mungbawng Rapdaw (WMR) gaw dai masat da sai nhtoi hpe March shata 31 de htingnut na matu tsun wa ai re.

Ning re ai masa ni a majaw, Laban shana ra ahkyak zuphpawng hta masat da sai Feb. 20 ya hpe kahtap shagrin la ai hte, Feb. 19 CSO zuphpawng de mung pati pawng hpawm hpung ni n lu lawm sai lam ni hpe dawdan la sai lam, KDP amu madu Slg. Gawngru Hpung Sar tsun ai.

KSDO, KDP hte KNC ningbaw ni gaw, pati pawng hpawm lam hte seng nna ginchyum dat bawngban ai lam ni hpe February 15, ndai bat Mali Ya hte Feb. 19, du na bat Langai Ya shani ni hta matut galaw na re chye lu ai.