Monggu shawnglam shara mi hta mu lu ai KIA Dapba 6 hpyenla ni

Lahta Sam mung Monggu kaw nna Loi Jung Bum hpe gala let Mungbaw de yu wa ai Myen hpyen Tatama (Dapnu) 11 hpe Wunpawng Mungdan Shanglawt Hpyendap, KIA Dapba 6 ni, February praw 1, dai hpawt hkying 10 jan hta bawm hte hkap dep gasat dat masai re.

Dapnu n-gun 60 daram hpe Mungbaw, Man Chyam mare lahta kaw bawm (2) hte hkap dep kapaw ai kaw Myen hpyendap maga si hkala lam nga ai hpe Dapba 6 shiga lawk tsun ai.

Si ai 3 hta 1 gaw du atsang hte bai langai gaw gyi atsang rai nna, hkala ai 7 hta 1 gaw du atsang re lam, myi-chyaw-mu ai ginra masha ni tsun ai re.

Jinghpaw mungdaw kata Myen hpyendap hte KIA lapran, laja lana gasat gala majan byin nga ten, Lahta Sam mung de mung majan ni matut byin nga ai re.