KIO Ningbaw Kaba Nban La, January 27 Ga Shaka Hkam La lamang, Laiza

Majan sawng nga ten, daini, Wunpawng Mungdan Shanglawt Hpung, KIO hte Myen hpyendap, wuhpawng lahkawng lahta tsang salang ni Miwa ga jarit Dali mare kaw hkrum bawngban nga ai re.

Miwa asuya lapran tsap ya ai hte, KIO Ningbaw Kaba Dukaba Nban La woi awn ai KIO hpung hte Tatmadaw Hkarang Dap, Masat (1) Hpyen Majan Masing Ginjaw (K.Ts.Ht snr BSO) up Lat Du Daju Jum Tun Tun Nawng woi awn ai hpung lapran, Yunnan mungdaw Bawshan mare, Dali zuphpawng galaw nga ai re.

Ndai zuphpawng gaw, Du kaba Nban La a January 27 Ningbaw Kaba ga shaka hkam la ngut ai hpang, No.1 lang Myen hpyendap hte hkrum bawngban ai lam rai nga ai.

Wuhpawng lahkawng dap lapran, Nam Hkam-Kai Htik-Manmaw lam, Myitkyina-Putau Lam hte Myitkyina-Danai Lido lam mayan hta, lai wa sai December shata kaw nna majan byin wa ai hta, ya grau grau laja lana byin nga ai re.

Myen asuya dap maga, hpyen n-gun kaba hte KIA hpe htim gasat ai hta, helicopter hte jet nbungli ni du hkra jai lang nga ai re.