Hkahku mung Sumprabum sinpraw maga Nhtan Zup kahtawng makau grup yin majan bai byin wa ai majaw ginra masha 700 jan hkrit kajawng let man ang ai nam mali kata de hprawng shingbyi nga ma ai re.

January 19 ya shani Lawt Mai Yang hte Mali Yang lapran Myen hpyendap hte Wunpawng Mungdan Shanglawt Hpung KIA ni majan bai byin wa ai majaw kahtawng masha ni Mali Hka sinpraw hkran de rap nna hprawng yen hkawm nga ai lam re.

Lawt Mai Yang, Ndup Yang, Nhtan Zup hte makau grup yin na mung masha 700 jan gaw ya yang tinang man ang ai de hprawng yen nga ai lam KBC shiga hta January 23, dai ni shapraw da ai re.

Nam mali kata yak hkak nga ai hpyen yen ni hpe shingran garum ningtum jaw ai lam garai n nga shi ai hpe KBC tsun ai.

Ya ndai hpyen yen ni hpe garum ningtum shalai ya na rai yang hka lam hta lai kawng lam n mai ai re. Htaw wa htaw sa Mali Hka jakli lam sha nga ai raitim Tayang Zup kaw Myen hpyendap ni bai malu masha arung arai tsepkawp n shalai pat hkum da ai re.