Mung Hawm maga Myen hte Kokang gap hkat

Lahta Sammung Majan Shiga

Myen asuya dap hte MNDAA Kokang dap lapran Lahta Sam mung Tamungnye ninghtawn Mung Hawm maga, mani, November 12 ya jahpawt daw gasat gala majan byin ai re.


Hong Du Ling ngu ai Lisu mare kaw MNDAA Dapnu 511 npu Dapdung 501 (Myanmar National Democratic Alliance Army) ni gan hkring nga ten Myen Dapnu 11 ngu sawn lu ai dap ni shawng sa gap ai kaw na hkying hkum mi daram gasat poi byin wa ai lam, dai ginra shiga lawk KNG Jinghpaw Shiga Dap de tsun ai.

Majan byin ai shara kaw nna minit 30 daram lam hkawm ra ai kahtawng de asuya dap ni htingnut mat ai majaw majan hkring mat ai re lam, lahta na shiga lawk tsun ai.

Ndai gasat gala majan a majaw hpyen yen nga n nga hte wuhpung lahkawng dap maga si hkala shiga, ni n chye lu ai.

Ndai majan shara gaw KIA Dapba 6 a ginra kata Dung 2 hte Dung 36 jarit hta rai nna kaga daphpawm (Northern Alliance-Burma) dap ni mung hpyen masa shamu shamawt nga ai re lam, KIA Dapba 6 shiga lawk tsun ai.

Ya ten KIA Dapba 6 ginra kata Munggu, Mung Baw hte Tamungnye ginra ni hta dapdung ai Myen hpyendap ni gaw tinang hte seng ai ginra ni hta hpyen masa shamu shamawt lam ni dingyang galaw nga ai hpe sagawn chye lu ai.